Жалал-Абад шаарынын 1996-ж.т. П. Т. аттуу тургуну шаардык милицияга арыз менен кайрылып, 2019-жылдын 26-сентябрь күнү саат 04:00 чамасында Жалал-Абад шаарындагы Ж.Бакиев көчөсүндөгү «Юг-Сити» соода борборунун жанында өзүнө тааныш эмес белгисиз 4-5 азиат улутундагы атуулдар эч себепсиз эле бет жагына бир нече жолу уруп, баасы 15 миң сомдук Самсунг А-30 үлгүсүндөгү кол телефонун тоноп кетишкендигин билдирген. Бул тууралуу ОИИБнин басма сөз кызматы билдирди.

Маалыматка караганда, жогоруда аталган факты боюнча топтолгон материал Жалал-Абад ШИИБдин КЖБРне катталып, сотко чейинки өндүрүш иши ачылган.  Берилген тергөө тапшырмасынын негизинде, ушул жылдын 9-октябрь күнү Жалал-Абад ОИИБдин жана Жалал-Абад ШИИБнин криминалдык милиция кызматынын кызматкерлери  тарабынан жүргүзүлгөн тергөө-ыкчам иликтөө иштеринин натыйжасында, кылмыш окуясына шектүү катары Сузак районунун тургундары 1997-ж.т. М.Н., 1996-ж.т. К.К., 1996-ж.т. К.К. жана 1996-ж.т. Т.Б.   кармалышкан. 

"Кылмыш окуясындагы далил буюм катары Самсунг А-30 үлгүсүндөгү кол телефону алынып, аталган шектүүлөр тергөө мезгилинде кылмыш ишин жасагандыгын моюндарына алышкан. КРнын ЖПКнын 98-беренесинин  негизинде, Жалал-Абад ШИИБдин тергөө кызматы тарабынан шектүү катары 4 атуул тең 48 саатка камалып, ал эми 11-октябрь күнү шаардык тергөө-сотунун токтому менен үй камагына чыгарылган", -деп айтылат маалыматта. 

Азыркы учурда алардын башка жасаган кылмыш иштерин аныктоо жана кылмыш ишин соттун кароосуна жиберүү максатында тергөө амалдары жана ыкчам-иликтөө иштери жүргүзүлүүдө.   

Булак: NazarNews.kg