Шоу-бизнес чөйрөсүндөгү белгилүү ырчы айымдардын жана мырзалардын сулуулугуна кам көрүп, алардын жаңы образдарын, имиджин идеалдуу кылып өзгөртүп, жүзүнө жарашыктуу макиядарды жасай алган Айдана Шамшидинова менен бүгүн биз чыгармачыл инсандардын сулуулугу тууралуу кеп салмакчыбыз.

- Салам, Айдана! Чыгармачыл инсандардын сулуулугуна кам көрүп келе жатканыңа канча убакыт болуп калды?

- Шоу-бизнес өкүлдөрүнө кызмат кылып келе жатканыма төрт жылдан ашып калды. 2013-жылдан бери сүйүктүү кесибим менен алек болуп келе жатам.

- Бул кесипти аркалап калууңа эмне түрткү болду эле?

- Бала чагымдан эле бул чөйрөгө абдан жакын болчумун. Эң алгач кызыгуум баарына себеп болду.

- Сенин дээрлик көпчүлүк кардарларың шоу-бизнестин өкүлдөрү эмеспи. Алар менен иштешүү сен үчүн кыйын эмеспи?

- Ырчылар менен иштешүү абдан кызыктуу. Азыркы учурда шоу-бизнес өкүлдөрүнүн көпчүлүгү менин кызматымдан пайдаланышат. Жылдыздар мен тууралуу бири-биринен угуп, биринин аркасынан бири “Сен абдан жакшы жасайт турбайсыңбы?” деп келе беришти. Ошону менен көп кардарлуу болдум. Көп адамдар кызыгып, “Ырчылар аябай “капризный” болушат го… Алар менен кантип иштешесиң?” деп суроо салышат. Бирок, алар кандай гана адам болбосун тилин таап, иштеп кетсе болот.

- Кайсы белгилүү ырчылар менен кызматташып турасың?

- Жийдеш Идирисова, Назгүл Токтакунова, Аяна асымова, Айжамал Кабылова, Гүлнара Калдарова, Кундуз Канатбек кызы, Роза Шакирова, Айнура Салахидинова, Фарида Карбосова, Самара Каримова, Айпери Кубик кызы ж.б. Ырчы айымдардын саны көп. Алардын баары атоо мүмкүн эмес.

- Сен атап өткөн ырчылар канча убакытта бир келип, кызматыңдан пайдаланышат?

- Баары тең кеңсебизге тез-тезден эле баш багышат. Кээ бири күн алыстан келип турушат.

- Ырчылардан кызмат көрсөтүүңө канча каражат талап кыласың?

- Эмгегибизге сөзсүз каражат алабыз. Кызмат көрсөтүүм арзан же кымбат деп айтпайм. Өзүмдүн ставкам бар. Ырчылардын көпчүлүгү дагы дайыма эле мага келип жасана беришпейт. Клип тарттырууда, маанилүү сьёмкага, телеге чыгууда же өзүнүн жеке концерттерин берүүдө менин кызматымдан пайланышат. Кээде концерт боло турчу жерге же үйлөрүнө чейин барып жасап берем.

Аруужан Булекбаева, NazarNews.kg