Азыркы кезде "шоопурдун шоопуру" делген Каныбек Туманбаев мамлекеттик саясатта көрүнүктүү фигуралардын бири катары, президенттин иш башкармалыгын башкарып илебине нан бышып турган чак. Учурунда Атамбаевдин шоопуру Икрамжан Илмияновдун шоопуру катары белгилүү эле. Эмне дейбиз, "бактылуу чочконун мурдунан бок кетпейт" деген ырас тура.

«Түшкө чейин иман, түштөн кийин Иван» Имановду ким билип атыптыр иманын ачпаган бойдон министрден кетти. Шоопурлардын мыктысы Туманбаев анан Иманов эле. Туманбаев АШАнын шопурунун шопуру болсо, Иманов Ширшов деген коррупционер босстун шопуру болгон. "Кимди ким көрдү, Быржыбайды там басты" болгон кадрдык бороондун капшабы Санариптик өнүктүрүү министрлигине дагы тийди. Министр Талантбек Иманов ээлеген ордун Нурия Кутнаевага бошотту. Эми министрдин милдетин аткаруучу болуп дайындалган Кутнаеванын талапкерлиги Жогорку Кеңеште каралып, бекитилет.

Иманын ачпаган Иманов министрден кетип ордуна  Кутнаева келди. Ал эми Талантбек Иманов болсо Улуттук инвестициялык агенттикке директор болуп барды. Майлуу-сүттүү кызматтарды тебетейдей алмаштырган Ширшовдун шоопуру болуп жүрүп, башайланткан карьера жасаган Иманов эми өлкөгө күргүштөтүп инвестиция тартып, экономиканы гүлдөтүп жиберет дегенге ким ынанат? 

Дегенибиз, буга дейре дээрлик эки жылга чукул Санариптик өнүктүрүү министрлигин жетектеп жарытпаган неме, инвестиция тартып кыйратып жиберши күмөн. "Шефи" Ширшов аркылуу кайра эле этегине эрмешип, жакасына жармашып күмөндүү инвесторлорду тартып, акча адалдаган былыктуу иштерден төбөсү чыкпаса болгону. Башка колунан иш келиши кыйын. Анткени, алма сабагынан алыс түшпөйт эмеспи. 

Оо, кийин, келечек муун өткөн кылымда балаңдай деген, азуусун айга жанган, атын укканда ыйлап жаткан бала сооронгон шоопурлардан турган "серый кардиналдар" болуптур деген уламыштар айтылса керек.

Чынында, шоопурлар кожоюнуна жакын болуп, ары-бери ташып жүрүп болгон сырын билип алган соң, "алгач койнуна кирип, анан мойнуна минген аялдардан" дагы өтүп кетишет окшойт.

Айталы, Алмазбек Атамбаевдин тушунда ити чөп жеп, ченебей көпкөн Икрамжан Илмиянов деген мамлекеттин эки тизгин бир чылбырын кармагысы келип, "көшөгө артында" көмүскө иштерди жең ичинде жүргүзүп турду го. Икрамжан деген серый кардиналдын атын укканда далай министрлер мышыктай "мыёлоп" жиберген доор өттү.

Ырасында, шоопурлар кыйын чыгаары биздин өлкөдө элеби, же башка чет жакта дагы ошондой болду бекен? Дегенибиз, мисал келтире берсек, төбөсү элге көрүнгөн тың чыкмалардын ичинде шоопурлуктан өскөндөр жетиштүү.

Мына, Жогорку Кеңештин эки жолку депутаты, Транспорт министринин орун басары болгон Таабалды Тиллаев кызматтык карьерасын кезинде ошол учурдагы Каржы министри, Ички иштер министри болгон Темирбек Акматалиевдин шоопуру болуп баштаган. Кийин кызын ала качып алып, натыйжада кайынатасынын аркасында саясатка аралашып, мансап, байлык күткөн. "Жаман атка жал бүтсө, жанына торсук байлатпайт" болуп, бутунан туруп алган соң, Акматалиевдин кызын ара жолго таштап ажырашып кеткен. Эр экен, жашашты билген.

Ошол эле Жогорку Кеңештин үч жолку чакырылышынын депутаты, Ысык-Көл облусунун губернатору болгон, "Бир бол" партиясынын лидери, азыркы кезде бараандуу саясатчыга айланган Алтынбек Сулайманов дагы Рустам Мамановдун шоопуру болгон. Ал кезде Мамановдун ташы өйдө кулап, акчалуу ишкер, Жогорку Кеңештин депутаты эле. Кийин, Сулайманов ичкен кудугуна түкүрүп Рустам Мамановго каршы көп иштерди жасады. Мына адамгерчилик?..

Азизбек КЕЛДИБЕКОВ, NazarNews.kg