Социалдык тармактарда аймактар аралык касташууну козутуу фактысы боюнча деген кине менен кармалып, эки айга тергөө абагына камалган «БеспределKG»нин ээси кайсы маалыматтары жана ал маалыматтардагы эмне болгон пикирлер үчүн кармалганын скриншоттолгон материалдары менен бирге УКМК билдирүү таратты.

Анда айтылгандай, Жоробеков Автандил соцтармактарга бир эмес бир канча ирет провокациялык, элди аймактык бөлүп-жарууга алып барган жалган маалыматтарды тараткан. Ага буга чейин эскертүү да берилген.

Бүгүн Автандил Жоробековдун бир тууган карындашы Чынара Темирова өзүнүн соцтармактагы баракчасы аркылуу бийликке, өкмөттүк эмес уюмдарга, дегеле жалпы коомчулукка видеокайрылуу жасаган.

Эжесинин маалыматына ылайык, 1984-жылы туулган Автандил Жоробеков чындыгында «БеспределKG» паблигинин администратору.

Белгилей кетсек, 24-ноябрында УКМК Башкы тергөө башкармалыгы тарабынан аймактар аралык касташууну козутуу фактысы боюнча социалдык тармактардын активдүү колдонуучусу “А.Ж.” кармалып, УКМК тергөө камак жайына киргизилгени тууралуу бүгүн, 27-ноябрда аталган мекеменин маалымат кызматы билдирүү тараткан. Бирок, анда ал ким экени айтылган эмес болчу.

2019-жылдын 25-ноябрында “А.Ж.” КР Кылмыш-жаза кодексинин 313-беренесинин 2-бөлүмүнүн 2-п. (аймактар аралык касташууну козутуу) боюнча кылмышка шектүү экени билдирилген.

Ал эми соттук өндүрүштүк иштердин алкагында кечээ, 26-ноябрда Биринчи май райондук соту Жоробековду 2020-жылдын 24-январына чейин УКМКнын тергөө абагына камоо өкүмүн чыгарган.

Булак: NazarNews.kg