Жогорку Кеӊеште “Токтогул ГЭСин реабилитациялоо. Фаза-3» долбоору боюнча каржылоо жөнүндөгү макулдашуу каралды. Токтогул ГЭСин калыбына келтирүү 3 фазадан турат. Ушу тапта ынын 1 - жана 2 - фазасы Азия өнүктүрүү банкы менен Евразия өнүктүрүү банкынын каржылык колдоосунда ишке ашырылууда. 3-фазада калган эки турбоагрегатты алмаштыруу каралган.

Ар бир агрегаттын кубаттуулугу 60 МВт чейин жогорулайт. Ал үчүн болжол менен 175 млн доллар көлөмүндө каражат талап кылынат. Аталган макулдашуунун алкагында Азия өнүктүрүү банкы 50 млн доллар өлчөмүндөгү гранттык жана 60 млн доллар өлчөмүндөгү насыялык каражат бөлдү.

Насыя каражаты «Электр станциялары» ишканасына кайра насыяга бериле тургандыктан, бюджетке кошумча күч келтирбейт. Мында акча каражаттарын кайтаруу – кубаттуулукту көбөйтүүнүн жана электрэнергияны кошумча иштеп чыгаруунун эсебинен ишке ашырылат.

Улуттук энергохолдингдин маалыматы боюнча, бул багытта 1,7 млрд доллар жумшалганы, анын ичинде 1,3 млрд доллар гранттык каражат болуп санала турганы, Ал эми Токтогул ГЭСинин үч фазасы үчүн баш-аягы 487 млн доллар жумшалары белгилүү болду. Бул тууралуу маалымат 2017-жылы чыккан.

Учурда Кыргызстан электр тармагын жоготуу алдында турат. Айрым жерлерде нараазычылык күчөдү. Фейсбук колдонуучу Наргиза Мадеминова:

--Кадамжайда үйлөргө кирип, мына ушундай кылып пломба басып, электр печкаларга тыю салып, "газга өткүлө, көмүр жаккыла" деп жатышат экен. Балалуу үй-бүлө сууктун күнүндө, түндөсү электр печкасы жок түнү менен көмүр жагып чыгыш керекпи эми. Көмүрдүн баасы асманда болуп жатса, бир кышка 1 тонна көмүр алып калганын ток менен чыккандар да көп көмүр алыш оңой эмес го, - деп жазып чыкты.

Белгилей кетсек, Токтогул ГЭСи 1975-жылы пайдаланууга берилген. Кубаттуулугу - 1200 МВт. Бүткүл өлкөнүн орточо иштеп чыгарган электрэнергиясынын 40 пайызы ага тийиштүү. Анын шаймандары жедеп эскирип калгандыктан, толугу менен алмаштырууга муктаж.

Булак: NazarNews.kg