«Байсалов Жириновскийдин милдетин аткарууга келгендей», - деди бүгүн, 16-октябрда, NazarNews маалымат агенттигине акын жана журналист Калдарбек Койлубайтегин.

- Калдарбек-агай, Эдил Байсаловду айрымдар маселенин ток этээр жерин айтты десе, кээ бирөөлөр мунун максаты башка дей баштады. Байсалов маселени кабыргасынан койдубу?

- Бул жигит бүгүн Орусиядагы Жириновскийдин милдетин Кыргызстанда аткарууга келгендей. Президент же башка атка минер ырасмий айталбаганды мына минтип эле согуп салат. Негизи, Байсалов туура нерсени айтып жатат.

Болгону, бир аз оройураак, кагазга оробостон ачыгыраак айтты. Бүттү. Оппозициянын катарында жилик тийбесе да жарты жиликке ээ болуп жүргөн жанында, көптү билет. Ошо сымал бийликке каршымын дегендер чычалап жатышат.

Баса, «бүтүнчүлөрдү» деле бийликтин партиясы деп атап койсо болот сыягы, анын катарында бүгүнкү спикердин жүрүшү эчтемкени билдирбейби?

Булак: NazarNews.kg