АКШ Тайванга курал сатып, аралды "жарылчу жарага" айлантып, ал эми элин түбү терең кырсыкка түртүп жатат. Бул тууралуу Кытайдын Коргоо министрлигинин расмий өкүлү Тань Кэфэй айтканын РИА Новости жазды.

Өткөн аптада Пентагон АКШнын мамлекеттик департаменти Тайванга эки сурамдын алкагында наркы 440 миллион долларга жакындап барган ок-дары менен жабдууларды сатуу ыктымалдыгын колдогон.

"Кытай Тайванга АКШнын курал сатуусуна каршы, бул туурасында Америка тарапка катуу эле айткан. АКШ Кытайдын ички саясатына одоно киришип, негизги кооптонууларын тоготпой келет. Тайвань кысыгындагы абалды атайын чыңалтып, аталган аймакты "жарылчу жарага" айлантып, тайвандыктарды түбү терең кырсыкка түртүп жатат", — деген Тань Кэфэй.

Анын айтымына караганда, Кытай Американы аталган аймакка курал-жарак сатууну, аны менен катар эле кандай гана формада болбосун аскердик кызматташууну тез арада токтотууну талап кылган.

"Жаңылган жана кооптуу болгон жол менен андан ары кетүүнүн кереги жок", — деген Тань Кэфэй.

Ал Кытайдын Элдик бошондук армиясы өлкөнүн суверендүүлүгүн, аймактык бүтүндүгүн, тынчтыкты жана Тайвань кысыгындагы туруктуулукту сакташ үчүн жогорку деңгээлдеги согуштук даярдыкта турганын белгиледи.

Эске салсак, АКШнын президенти Жозеф Байдендин администрациясы Тайванга 500 миллион долларлык курал-жарак жеткирүүнү пландап жатканын ЖМКлар жазган.

Ал эми Тайвандын тегерегиндеги кырдаал АКШ Конгрессинин Өкүлдөр палатасынын спикери Нэнси Пелосинин аралга сапары тууралуу маалымат пайда болгондон кийин курчуй баштаган. Саясатчы Кытайдын мындай кадамдан баш тартууну өтүнгөнүнө карабай Тайбэй аэропортуна 2-августта конгон. Конгрессмен сапарын "Кошмо Штаттардын Тайвандагы демократияны колдоого умтулгандыгынын далили" деп атаган. Бул 1997-жылдан бери АКШнын Өкүлдөр палатасынын спикеринин Тайванга жасаган биринчи сапары болду. Андан кийин Кытай бийлиги АКШ менен кээ бир тармактарда кызматташууну убактылуу токтотууну чечкен.

Булак: NazarNews.kg