Бүгүн, 7-декабрда Кытайда коронавирустун жеңил түрү бар бейтаптарга дарылануу үчүн үйдө калууга уруксат берилди. Бул өлкөдөгү нааразылык акцияларынан кийин COVID-19га каршы саясатта чоң өзгөрүүнү билдирет. Бул тууралуу «Рейтер» агенттиги билдирди.

Кытай жарандарынын аймактар ​​аралык саякаттоо үчүн COVID-19га каршы терс тестти көрсөтүү талабы да алынып салынганы белгиленген. Бул 2019-жылдан бери коронавирустун чектөөсүндө жашап жаткан Кытай экономикасынын кайра ачылышын билдириши мүмкүн.

«Бул саясаттын өзгөрүүсү алдыга жасалган чоң кадам. Мен Кытай чек арасын 2023-жылдын ортосунан кечиктирбестен толугу менен ачат деп күтөм», - деди Pinpoint Asset Management башкы экономисти Чжан Чживэй.

Ушул жылдын ноябрь айынын аягында Кытайдын бардык шаарларында катуу COVID-19 саясатына каршы нааразылык акциялары өттү. Бул Си Цзиньпин 2012-жылы бийликке келгенден берки эң ири нааразылык акциясы болду. Бул демонстрациялар полициянын катышуусу менен бир нече күн уланды.

COVID-19 чектөөлөрү жеңилдеген сайын, кытайлыктар профилактикалык дары-дармек сатып алууга шашышты. Вакцинацияланбаган улгайган адамдар коронавируска өзгөчө аялуу. Дары-дармектерге болгон суроо-талаптын кескин өсүшүнүн натыйжасында баалар өтө кымбат болуп кетти. Адамдардан акылмандык менен жана муктаждыктарына жараша дары-дармек сатып алуу суралган.

Эскерте кетсек, Кытайда нааразылык акциялары Шинжаң-Уйгур автономиялуу районунун Үрүмчү шаарындагы турак үйдөн чыккан өрттөн кийин башталган. 24-ноябрдын кечинде болгон өрттүн кесепетинен кеминде он адам каза болуп, дагы тогуз адам жабыркаган. Күбөлөрдүн айтымында, чектөөлөрдөн улам батирлердин эшиги тосулуп калгандыктан адамдар өрттөн качып кутула алышкан эмес. Кытай өкмөтү бул маалыматты четке какты.