Бүгүн 15-июлда, маркум Молдакун Абдылдаевдин жубайы менен уулу акыркы сапарга саат 10:00дө Кара-Жыгач конушунда узатылат. Бул тууралуу маркум жубайлардын кызы Индира билдирди.

Жайыл районунун аймагынан Көкөмеренге кулаган унаадагы 5 адамдын акыркысы — Илимбек Абдылдаевдин денеси 14-июлда саат 11:10 чамасында Жумгалдагы Арал айылынан 7-8 чакырым төмөн тараптан табылды.

Буга чейин Молдакун Абдылдаевдин, анын жээн небересинин, жубайынын жана айдоочунун денеси табылган. 

30-июнда Ат-Башыдан Суусамырга бара жатканда Көкөмерен суусуна кулаган унаада жалпы 5 адам болгон.

Алар:

- 1960-жылы туулган Молдакун Абдылдаев, өкмөттүн Чүй облусундагы ыйгарым укуктуу өкүлчүлүгүнүн аппарат жетекчиси болуп эмгектенип жаткан;

- Молдакун Абдылдаевдин жубайы — 1962-жылы туулган Шадыканова Тинатин Сыдыгалиевна. Билим берүүдөгү заманбап маалыматтык технологиялар институтунун окуу иштери боюнча проректору.

- Молдакун Абдылдаевдин уулу — 1993-жылы туулган Илимбек Абдылдаев. Маалыматтык технологиялар жана байланыш мамлекеттик комитетинин стратегиялык пландаштыруу жана аналитикалык камсыздоо бөлүмүндө жетектөөчү адис болуп иштеген;

- Молдакун Абдылдаевдин жээн небереси — 2011-жылы туулган Софья Борукеева;

- Айдоочу — 1996-жылы туулган Бакыт Абдылдаев [тууган эмес, фамилиясы окшош].

Булак: NazarNews.kg