Өткөн жылы соттун чечими менен үч ай психиатриялык ооруканага жатып чыккан өзбекстандык блогер Нафосат Оллашукурова өлкөдөн чыгып кетүүгө мажбур болгонун билдирди. Бул тууралуу ал «Фейсбуктагы» баракчасына жазды.

— Мен диспансерден чыккандан кийин бийлик бир нече жолу Ташкент шаардык психиатриялык ооруканасына каттоого тургузууга аракет кылды. Мени каалаган убакта кайрадан мажбурлап ооруканага жаткырып коюшмак, — деп жазда ал.

«Фейсбукта» блог жүргүзгөн 32 жаштагы англис тил мугалими Нафосат Оллашукурова былтыр күзүндө журналист Махмуд Ражабдын жөө жүрүшүнө катышып, аны «Фейсбук» аркылуу чагылдыргандан кийин кармалган. Алгач ал «бейбаштык кылган» жана «уруксат берилбеген акцияга катышкан» деген айып менен 10 күнгө кесилип, үч күндөн кийин психиатриялык ооруканага жаткырылган. Анда өлкөнүн Башкы прокуратурасы камакка алынган күндүн эртеси Оллашукурованын «психологиялык абалы өзгөргөнүн» билдирген. Блогер диспансерден 2019-жылы декабрда гана чыгарылган.

Телефон аркылуу «Азаттыктын» өзбек кызматынын кабарчысы менен сүйлөшкөн Нафосат Оллашукурова психиатриялык ооруканадан чыккандан кийин үйүнө үч жолу психиатрлар келип кеткенин билдирди.

– Алар мени алып кете алышкан жок, анткени ал учурда мен үйдө эмес болчумун. Психиатрлар менин саламаттыгымды текшергени келишкенин айтышкан, бирок мен ишенген жокмун. Анткени кечки саат алтыда ден соолугумду текшерүү үчүн кайсы дарыгер келмек эле? Анан өмүрүмө коркунуч жаралгандыктан Өзбекстандан чыгып кеттим, – деди Оллашукурова.

Мындан тышкары блогер Хорезм облустук ички иштер башкармалыгында кармалып турганда кыйноого алынганын кошумчалады.

– Сурак маалында Махмуд Ражабдын жөө жүрүшү Мухаммад Салих тарабынан уюштурулганын айтып, аларга каршы көрсөтмө берүүмдү талап кылышты. Бирок мен макул болгон жокмун. Алар мага басым жасоо максатында кыйкырып, андан соң сабашты. Чачыман сүйрөп, курсакка тебишти. Андан кийин психиатриялык ооруканага жаткырышты, – деди Оллашукурова.

Анын айтымында, укук коргоо кызматкерлери андан блогердик ишмердүүлүгүн токтотууну жана кыйноого алынгандыгы тууралуу эч кимге айтпоону талап кылышкан. — Кыйноо жөнүндө ооз ачсам кайрадан психиатриялык ооруканага жаткыра тургандыктарын айтышкан. Ошондуктан Өзбекстанда жүргөндө бул тууралуу айта алган эмесмин, — деди блогер.