Грузиянын Апелляциялык соту өлкөнүн мурдагы президенти Михаил Саакашвилинин чек араны мыйзамсыз кесип өткөнү боюнча иши боюнча оозеки отурум өткөрбөй, биринчи инстанциянын өкүмүн күчүндө калтырды.  

Бул иш боюнча 2021-жылы Грузияга жашыруун кайтып келген Михаил Саакашвили 4,5 жылга эркинен ажыратылган. Бул кийинчерээк башка иштер боюнча өкүмдөр менен бириктирилип, акыркы өкүм 12 жыл 6 айга эркинен ажыратылды.

Саакашвилинин жактоочусу Бека Басилая соттун чечими кылмыш-процессуалдык мыйзамдардын нормаларына каршы келет деп билдирди. Анын айтымында, судья өкүмдөрдү болуп көрбөгөндөй бириктирип, акыры аны негизсиз 12,5 жылга эркинен ажыраткан.

Маалымат үчүн айта кетсек, Саакашвили Грузиядан 2013-жылы чыгып кеткен, андан кийин өлкөдө ага каршы төрт кылмыш иши козголуп, анын экөөсүндө саясатчы сыртынан үч жана алты жылга эркинен ажыратылган. 2021-жылдын октябрында Саакашвили Грузияга жашыруун келгенде камакка алынган. 2022-жылдын май айында ден соолугунун начарлашына байланыштуу Тбилисидеги «Вивамед» жеке клиникасына которулган.

Ошентип, өкүмдөр жарым-жартылай кошулгандыктан, Михаил Саакашвили 12 жыл 6 айга эркинен ажыратылды. Грузиянын мурдагы президентинин тарапкерлери жана укук коргоочулары ага тагылган айыптарды саясий куугунтук деп эсептешет. Евробиримдик Михаил Саакашвилини саясий туткун деп тааныды.

Белгилей кетсек, Грузиянын бийликтеги “Грузин кыялы” партиясы буга чейин Михаил Саакашвилини 2008-жылы тышкы күчтөрдүн буйругу менен Түштүк Осетияга каршы согуш баштаган деп айыптаган.

Мухаммад Ходиев, Ташкен