Таласта 30 жаштагы жаран киши колдуу болду. Аны өлтүрүүгө шектелип бир тууган иниси кармалды. Бул тууралуу Бакай-Ата РИИБинен билдиришти.

Маалыматка ылайык, 22-июнда Бакай-Ата районунун Кызыл-Сай айылынын тургуну 1999-жылы туулган М.Ж. аттуу жаран арызы менен кайрылган. Анда 21-июнь күнү саат 19:00 чамасында бир тууган байкеси 1994-жылы туулган М.К. үйдөн чыгып кеткен бойдон дайынсыз болуп жатканын билдирип, таап берүүнү суранган. Аталган арыз Бакай-Ата РИИБ тарабынан каттоого алынып, издөө иштери башталган.

24-июнда саат 18:30 чамасында дайынсыз болуп жаткан М.К.нын киши колдуу болгон жансыз денеси өзү жашаган үйдүн артындагы сарайынын жер төлөсүнөн табылган.

Аталган факты Бакай-Ата РИИБдин кылмыштардын бирдиктүү реестрине катталып, КЖКнын 122-беренесинин 1-бөлүмүндө көрсөтүлгөн (Адам өлтүрүү) кылмыш белгилери менен кылмыш иши козголгон.

Ыкчам иш-аракеттердин жыйынтыгы менен кылмышка шектүү катарында маркумдун бир тууган иниси 1999-жылы туулган М.Ж. кармалып, Талас ОИИБдин УКЖга камакка алынды. Учурда тийиштүү соттук экспертизалар дайындалды.

Кылмыш иши боюнча тергөө амалдары жүргүзүлүүдө.