Бүгүн, болжол менен түнкү бирлер чамасында 27 жаштагы А.Ж. аттуу жаран Бишкек-Нарын-Торугарт унаа жолунда Субару Импреза унаасын айдап баратып, жүк ташуучу Норд унаасы менен кагышкан.

Кырсыктын кесепетинен Субарунун айдоочусу жана бул унаанын үч жүргүнчүсү каза болсо, дагы бир 20 жаштагы жигит оор абалда ооруканага жеткирилген.

Каза болгондордун арасында жаш төкмө акын, обончу, маркум төкмө акын Майра Керим кызынын өнөрүн уланткан уулу Акжолтой Канат уулу жана анын келинчеги да бар. Каза болгон 25-30 жаштардагы кыздын ким экендиги такталып жатат.

Нарын облустук милициясынан кабарлашкандай, тергөөнүн алдын ала жыйынтыгына караганда, Субару Импрезанын айдоочусу тайгак жолдо унаасын башкара албай калып, жолдун каршы тилкесине чыгып кеткен. Учурда тергөө иштери жүрүп жатат.

Айрым маалыматтарга караганда, Акжолтой Канат уулу келинчеги менен Кочкор районуна тойго бараткан.

Булак: NazarNews.kg