АКШ президенти Дональд Трамптын Россиянын лидери Владимир Путин менен жолугушуусу тууралуу айткандарынан кийин Украинада тынчсыздануу пайда болду, бул жолугушуу согушту токтотушу мүмкүн, деп жазат Bloomberg агенттиги.

"Украиналыктар Трамптын жакында айткан: 'Тынчтык ошондо гана келет, качан ал жана Путин бетме-бет жолукканда' деген сөзүн укканда, тынчсыздануу толкунун сезишти", — деп айтылат макалада.

Мындан тышкары, макала авторунун айтымында, АКШ тарабынан Украинаны колдоонун токтотулушу эми убакыт маселеси гана болуп калды.

Мурунку күнү Стамбулда акыркы үч жылдагы алгачкы түз сүйлөшүүлөр өтүшү керек болчу. Бул сүйлөшүүнү Россия президенти Владимир Путин сунуштаган.

Бирок, жолугушуу башталган жок — Россия тараптары эртең менен эле Стамбулга келип жетишкенине карабастан, Украина президенти Владимир Зеленский Түркия президенти Режеп Тайып Эрдоган менен сүйлөшүү үчүн Анкарага кеткен. Ал украин делегациясынын курамын кечинде гана бекиткен.

Россиялык делегацияга Тышкы иштер министринин орун басары Михаил Галузин, Башкы штабдын Башкы башкармалыгынын башчысы Игорь Костюков жана Коргоо министрлигинин орун басары Александр Фомин кирет.

Украина тарапты коргоо министри Рустем Умеров жетектейт.

Reuters агенттиги америкалык атын атабаган чиновниктин маалыматына таянып билдиргендей, Трамп мурда сүйлөшүүлөргө катышуу үчүн Түркияга баруу мүмкүнчүлүгүн карап көргөн, бирок андан баш тарткан.

АКШ президенти Путин менен жолугушуу күтүлүп жаткан шартта, жума күнү Вашингтонго кайтып кетиши ыктымал экенин билдирген, бирок так кайсы жерге барары белгисиз бойдон калууда.

АКШ мамлекеттик катчысы Марко Рубионун айтымында, Россия менен АКШ президенттеринин жолугушуусу гана жаңжал боюнча чыныгы жылышка себеп боло алат. Бирок, ал жолугушуунун күнү али тактала элек. Рубио эки тарап да бул сүйлөшүүнү кантип уюштуруу маселесин чечиши керек экенин белгиледи.