Бишкек шаарындагы түнкү клубдардын бириндеги мушташтын кесепетинен каза болгон жигиттин өлүмүнө шектелип 2 адам кармалды. Бул тууралуу бүгүн, 29-Октябрь ШИИБдин басма сөз кызматы билдирди.

Маалыматка таянсак, 28-октябрь күнү саат 01:30 чамасында Октябрь РИИБдин нөөмөт бөлүмүнө түнкү клубда мушташ чыкканы тууралуу маалымат келип түшкөн. Окуя болгон жерге ыкчам топ барып, эс-учун жоготуп жаткан адамды табышкан. Жабырлануучу тез жардам унаасында көз жумган. Ал 2000-жылы туулган Б.А. экени такталды.

Териштирүү иштеринин жүрүшүндө түнкү клубдагы жигиттер кайым айтышып, андан кийин мушташ чыккан. Бул факты боюнча Октябрь РИИБдин тергөө кызматы Кылмыш-жаза кодексиндеги 104-берененин (саламаттыкка атайылап оор залал келтирүү) негизинде кылмыш иш козгогон.

Криминалдык милиция кызматынын кызматкерлеринин ыкчам иш-чараларынын жүрүшүндө аталган кылмышка шектелип 2001-жылы туулган М.у А. менен 2000-жылы туулган О.Р. кармалып, убактылуу кармоочу жайга киргизилди.

Булак: NazarNews.kg