Сахнага сүйүү темасындагы ырларды аткарып, коомчулукка таанымал боло алган шайыр мүнөз ырчы жигит Алмаз Шаадаев менен чыгармачыгы тууралуу баарлаштык.

- Алмаз, 2016-жылы “Фаридам” аттуу ретро ырды аткарып, эл оозуна алындың окшойт...

- Ооба, туура. Бул ырды жөн жеринен тандап алганым жок. Өз учурунда Асылбек Өзүбеков агабыздын аткаруусунда абдан хит ыр болгон. Бул ырды репертуарыма кошконго чейин көпкө издендим. Кандай стилде жазсам деп ойлондум. Акыры бир чечимге келип, авторлордун уруксааты менен аткарып чыктым. Эмгегим текке кеткен жок. Көпчүлүккө жакты. Клиби да менин көңүлүмө толду.

- Мурда сени тойдон көп көрчү эмес элем. Бул ырдын аркасы менен бир да тойдон калбай калдың го...

- Ыр жарыкка чыккан соң, социалдык тармактан жакшы ой-пикирлерди калтырып, радиолордон ырды көп суранган кыргыз эли болду. Күз мезгилинде ““Фаридам” деген ырыңды аткарып берчи” деп тойлорго көп буйрутмалар түштү. Ийгиликтерим үчүн Кудайга шүгүр кылам. Тынбай эмгек кыла берсең, акыбети бир күн болбосо бир күнү сөзсүз кайтып келээрине ишенип калдым. 

- Жакында сенин кандай ырларыңа күбө болобуз?

- Азыркы тапта үч ырдын үстүнөн иштеп жатам. Бул жума ичи “Күлүп койчу айдай” аттуу жаңы ырымды жарыкка чыгарам.

- Ыр тандоодо эмнеге көңүл бурасың?

- Эң алгач обонуна андан соң сөзүнө терең маани берем. Обончу, акындар менен иштешүүдө мен эмне каалап жатканымды ачык айтып, оюмдагы нерсени талап кылам.

- Гастролдорго чыгуу пландарың барбы?

- Ооба, алдыдагы пландарымда эн биринчи гастролдоо турат. Жаз мезгилинде көпчүлүк ырчылар гастролго чыгышат. Мен дагы элден калбай Кыргызстанды кыдырып, жеке концертимди берем. Андан соң борборго чоң программадагы жеке концертимди тартуулоого даярданам.

Аруужан Булекбаева, NazarNews.kg