“Анык эмес (жалган) маалыматтан коргоо жөнүндө” мыйзамына өзгөртүү киргизүү долбоору бир жуманын ичинде парламенттин тиешелүү комитетине жөнөтүлөт. Бул тууралуү сөз эркиндигинин абалы талкууланган жыйында депутат Жанар Акаев билдирди.

Анын айтымында, бул долбоор бийликтин каалаган сайтты жаап салуу аракетин татаалдаштырат.

«Бул мыйзам долбоорун кабыл албасак, азыркы тенденция абдан кооптуу. Эл аралык ири медиа болгон «Азаттыктын» ишмердүүлүгүн токтотуу аракеттери болуп жаткандан кийин башка көз карандысыз басылмаларды жабуу коркунучу дагы турат. Мыйзам ушуга жол берет. «Бир кат менен жаап коебуз» деген өнөкөт пайда болушу мүмкүн. Мурда кайсыл бир журналисттин же блогердин суракка чакыртылышы резонанс жаратса, азыр кадыресе көрүнүш катары кабыл алына баштады», — деди Акаев.

Эске салсак, Жогорку Кеңештин жети депутаты «Анык эмес (жалган) маалыматтан коргоо жөнүндөгү» мыйзамга өзгөртүү киргизүүнү демилгелеп, мыйзам долбоору өткөн жылдын 14-октябрында коомдук талкууга чыгарылган.

Мыйзам долбоорунда фейктер тууралуу мыйзам «Административдик иштин негиздери жана административдик жол-жоболор жөнүндөгү» мыйзамга жана Административдик-процесстик кодексинин жоболоруна каршы келери жазылган. Авторлордун айтымында, ансыз деле мамлекеттик органдардын чечимдерин кароо жана даттануу жол-жоболору такталган.

Ошондой эле, документте Конституциялык принциптерге ылайык, Кыргызстанда сөз эркиндигин чектеген мыйзамдарды кабыл алууга жол берилбейт турганы белгиленген.

Мыйзамды иштеп чыккан эл өкүлдөрү: Жанар Акаев, Адахан Мадумаров, Элмурза Сатыбалдиев, Гуля Кожокулова, Дастан Бекешев, Сеид Атамбаев жана Чынгыз Айдарбеков.

Булак: NazarNews.kg