АКШ президенти Дональд Трамптын администрациясы өлкөгө киргенден кийин башпаанек сураган чет элдик жарандардын 200 миңге чейин ишкердик жана туристтик визасын жокко чыгаруу мүмкүнчүлүгүн карап жатат.

Бул тууралуу Associated Press АКШнын Мамлекеттик департаментинин документтерине жана америкалык аткаминерлерге таянып билдирди.

Сөз 2016–2026-жылдар аралыгында берилген B1 жана B2 категориясындагы иммиграциялык эмес визалар тууралуу болуп жатат. B1 визасы негизинен ишкердик сапарларга, ал эми B2 визасы туризмге, туугандарга барууга жана медициналык жардам алууга арналган.

АКШнын Мамлекеттик департаментинде айрым чет элдиктер өлкөгө убактылуу келүүчү катары кирип, кийин АКШда калуу максатында башпаанек сураган болушу мүмкүн деп эсептешет.

Мамлекеттик департаменттин өкүлү Томми Пиготт ведомство Улуттук коопсуздук министрлиги менен биргеликте мындай жарандарды аныктап, алардын иммиграциялык эмес визаларын жокко чыгаруу боюнча иш жүргүзүп жатканын билдирди.

Мамлекеттик катчынын орун басары Кристофер Ландау башпаанек берүү системасы иммиграциялык мыйзамдарды айланып өтүү үчүн колдонулбашы керектигин белгиледи.

Жокко чыгарылышы мүмкүн болгон визалардын так саны азырынча белгисиз. Текшерүү этап-этабы менен жүргүзүлө тургандыктан, акыркы көрсөткүч өзгөрүшү мүмкүн.

Ошол эле учурда визанын жокко чыгарылышы автоматтык түрдө депортациялоо дегенди билдирбейт.

Башпаанек берүү боюнча арызы каралып жаткан чет элдиктердин көбү иммиграциялык системада кала берет, бирок алардын B1 же B2 визалары күчүн жоготот.

Эгер бул чара айтылган масштабда ишке ашырылса, АКШнын тарыхындагы визаларды массалык түрдө жокко чыгарган эң ири учурлардын бири болушу мүмкүн.

Чечим соттордо талашка түшүшү күтүлүүдө.