23-октябрда Кадамжай районунун Майдан айыл округуна караштуу Майдан айылындагы «Шамбесай» кенин иштетүүгө каршы нааразычылык акциясы болгон. Анда катышкан аялдарды милиция кызматкерлери сүйрөп бараткан сүрөт социалдык түйүндөрдө талкуу жараткан эле.

Митинг болгон жерде күч колдонулуп, адам укугу тебеленбеши керек деген Акыйкатчы Токон Мамытов аталган окуя боюнча жеринен барып тактоо иштерин жүргүзүү тапшырмасын Баткен өкүлчүлүгүнө берген. Бул тууралуу маалыматты Акыйкатчынын басма сөз кызматы билдирди. 

Тактоо иштерин жүргүзүү жана маалымат алып, мониторинг жүргүзүү боюнча 26-октябрда өкүлчүлүктүн кызматкерлери окуя болгон жерге барышты.

Окуя боюнча маалыматтар жергиликтүү тургундардан алынган. Алар аталган алтын кенин ачууга каршы экендиктерин билдиришип алтын кенди иштетпөө талабын коюшкан. Себеби алтын кени ачылса экологияга жана элге чоң таасирин тийгизээрин айтышкан, анткени «Шамбесай» алтын кени Майдан айылында жайгашып элдер жашаган жерге жакын экендигин б.а. 40 метр аралыкта жайгашкан. Тургундардын айтымында “Шамбесай” алтын кенин ачуу боюнча чалгындоо иштери 2008-жылдан бери келе жатканын, жалпы эл аталган алтын кенин ачууга жана иштетүүгө каршы болуп ушул күнгө чейин келе жатканын билдиришти. Чалгындоо иштери жургон мезгилде, экологияга, адамдарга жана мал жандыкка чон таасирин тийип келе жатканын, натыйжада ар кандай мал жандыктар туула баштаганын айтышкан.

 Нааразычылык акциясына 150 дөн ашуун тургундар катышкан. Ал жерде милициялар 5-6 аялдарды колунан тартып четке сүйрөп чыгарышканын айтышты. Ал аялдар Акыйкатчынын өкүлүнө ошол окуядан кийин алардын бир экөөсүнүн колдору, башы ошол ооруксунуп калганын, бирок ооруканага кайрылбаганын билдиришти.

Алынган маалыматтарга ылайык бул окуя боюнча эч ким камакка алынган эмес жана эч ким ооруканага тушкон эмес, бирок бул окуя боюнча тургундар укук коргоо органдарынын аракетине карата нааразычылык катын Акыйкатчынын наамына жазышты. Каттын негизинде Акыйкатчы тарабынан тийиштүү иштер жүргүзүлмөкчү.

Жолугушууга келген тургундарга өкүлчүлүк тарабынан Акыйкатчы Институту жөнүндө жана тынч жыйындарга чыгуунун мыйзамда көрсөтүлгөн эрежелери, тартиби жөнүндө маалыматтар айтылды. 

Булак: NazarNews.kg