Жогорку Кеңештин Отун-энергетикалык комплекс, жер казынасын пайдалануу жана өнөр жай саясаты боюнча комитетинин депутаттары Кумтөргө барып келди. Бул туурасында комитеттин мүчөсү Алишер Козуев билдирди.

Анын айтымында, эл өкүлдөрү 19-апрель күнү барып алтын кендин учурдагы абалы менен таанышышкан. Аларга "Кумтөр Голд Компанинин" сырттан башкаруучусу, "Улуу Көчмөндөр Мурасы" холдингинин төрагасы Теңиз Бөлтүрүк келечектеги пландары менен бөлүшкөн.

"Биздин сапардын максаты Кумтөр кениндеги иштер боюнча кенен маалымат алуу болду. Теңиз Бөлтүрүк мурда бир цех иштесе, алдына дагы бир фабрика салам деген планын айтты. Азыр бир эле жерди казып жатышат, кийин эки-үч жерди казуу планы бар экен. Эгерде зарылчылык болсо, Лысый, Давыдов мөңгүлөрүнө тийбей туруп, тоннель түрүндө казууга өтөрүн айтты", — деди Козуев.

Эл өкүлдөрү кен казылган жерди, уу калдыктарды сактоочу жайды жана алтын өндүрүүчү комбинатты кыдырышкан.

"Уу калдыктар сакталган жайдагы 100 тоннадан ашык алтынды келечекте иштетүү планы жөнүндө маалымат беришти. Теңиз Бөлтүрүк "Кумтөрдүн" ар кандай керектөөлөрүн камсыз кылуучу ишканаларды текшерип, баасын ашыкча коюп алгандарды да тартипке салып жатканын билдирди. Мындан ары "Кумтөр Голд Компани" ишканасынын 100 пайыз акциясы Кыргызстанга таандык", — деди депутат.

Ошондой эле ал өлкө ичинде өндүрүлгөн товар эч кандай сыр болбошу керектигин айтты.

Эске салсак, 4-апрель күнү президент Садыр Жапаров Кумтөр кени толугу менен Кыргызстандын карамагына өткөнүн жар салган. Андан кийин Centerra Gold Inc. Кыргызстандагы "Кыргыз алтын" ишканасындагы бизнес-активдерин сатууга макулдугун бергенин жана өлкөдөн кетерин жарыя кылган.

Булак: NazarNews.kg