Кыргызстандын Улуттук коопсуздук боюнча мамлекеттик комитети мурдагы президент Курманбек Бакиевди жактаган тасмаларды көрсөткөн маалымат каражаттарына эскертүү берди.

31-июлда УКМК тараткан билдирүүдө “Ар кандай маалымат булактарында экс- президент Бакиевди жана анын жакын туугандарын колдогон материалдар тууралуу УКМК төмөнкүнү билдирет. Мындай маалыматтардын жана телевизиондук материалдардын авторлору өздөрүнүн жасаган иш-аракеттери жана анын кесепеттери канчалык олуттуу экенин толук билишпейт. Буга байланыштуу УКМК авторлорго коомдо тирешүүгө алып келе турган иш-аракеттерге жол бербестигин эскертет” деп айтылды.

Курманбек Бакиев Кыргызстанды 2005-2010-жылдары башкарган. 2010-жылдын апрелинде элдик толкундоолордон кийин өлкөдөн кеткен бойдон үй-бүлөсү менен Беларустун борбору Минск шаарында жашайт.

1-августта ал 70 жашка толот. 30-июлда НьюТВ жана НурТВ телеканалдарында аны жактап, куттуктаган тасмалар көрсөтүлгөн. Азизбек КЕЛДИБЕКОВ, «NazarNews.kg»