Орозо айында Газа тилкесинде ок атууну токтотуу боюнча БУУнун Коопсуздук кеңешинин резолюциясы милдеттүү түрдө аткарылышы керек. Бул тууралуу уюмдун башкы катчысынын расмий өкүлүнүн орун басары Фархан Хакка билдиргенин РИА Новости жазды.

"БУУнун Коопсуздук кеңешинин бардык резолюциялары эл аралык укук болуп саналат. Демек, милдеттүү түрдө аткарылышы керек", — деди ал.

АКШнын БУУдагы туруктуу өкүлү Линда Томас-Гринфилд болсо Коопсуздук кеңеш кабыл алган резолюция "милдеттүү эмес" деп билдирди. Ал эми Россиянын туруктуу өкүлүнүн биринчи орун басары Дмитрий Полянский америкалык дипломат эмнени айткысы келгенин Москва ачыктай турганын белгиледи.

"Биз Коопсуздук кеңешинин резолюцияларына карата бул көз караш менен таптакыр макул эмеспиз", — деди ал.

Россиянын туруктуу өкүлү Василий Небензя Томас-Гринфилддин "БУУ Уставын окубаганына" өкүнүп жатканын айткан.

Дүйшөмбү күнү БУУнун Коопсуздук кеңеши 7-октябрдан бери алгачкы ирет Газа тилкесинде Орозо айында атышууну токтотууну талап кылган резолюция кабыл алган. Бул нерсе узак мөөнөттүү элдешүүгө алып келмек. 14 өлкө макул деп добуш берсе, АКШ карманып койгон. Резолюциянын текстинде уурдалган адамдарды бошотуу каралган эмес. Тель-Авивге ушул нерсе жакпай турат.

Израилдин премьер-министри Биньямин Нетаньяхунун кеңсеси буга чейин АКШ Газа тилкесиндеги согуш боюнча позициясынан алыстаганын билдирген. Бул Тель-Авивдин согуш аракеттерине жана барымтадагыларды кайтарып берүүгө зыян келтиргени кошумчаланган. Кеңсе АКШнын позициясынын өзгөрүшүнө байланыштуу Газа тилкесинин түштүгүндөгү Рафах шаарында калган ХАМАСтын батальондорун жок кылуу боюнча пландалган операцияны талкуулай турган жогорку деңгээлдеги делегацияны Нетаньяху Вашингтонго жибербөө чечимин кабыл алганын белгилеген.

Израилдин тышкы иштер министри Исраэл Кац барымтадагылардын баары бошотулмайынча Израилдин аскерлери Газа тилкесиндеги согушту токтотпой турганын билдирди.

Булак: NazarNews.kg