Лейла Саралаевага кылмыш иши козголду

Журналист: NAZARNEWS

01.10.2025, 15:36

13185

коом

Көп жылдан бери иликтөөчү журналистика менен алектенип келген, азыр Грузияда жашап жаткан Лейла Саралаевага Кыргызстандын укук коргоо органдары “массалык башаламандыкка чакырык” деген айып такты. Бирок журналист өзү бул иш тууралуу 1,5 жылдан кийин гана кабар алганын, ал арада эч кандай расмий билдирүү берилбегенин айтат.

Ички иштер министрлиги 1-октябрда бул маалыматты ырастады. Алардын айтымында, Саралаеванын социалдык тармактардагы билдирүүлөрү экспертизага жиберилип, "массалык башаламандыкка үндөгөн белгилер бар" деген жыйынтык чыккан. Бирок журналистке берилген экспертизада “чакыруу жок, бирок бийликти сындоо бар” деп гана жазылганы айтылып жатат.

Эске салсак, “Чек арасыз кабарчылар” уюмунун маалыматына караганда, Кыргызстан 2025-жылы басма сөз эркиндиги боюнча 180 өлкөнүн ичинен 144-орунду ээлеп, 24 тепкичке артка кетти. “Freedom House” уюму болсо өлкөнү бешинчи жыл катары менен "эркин эмес" мамлекеттердин катарына кошту.

Айтымында, журналисттер өз позициясы үчүн жоопко тартылып, кээде мыйзамсыз жолдор менен суракка чакырылган. Ошону менен бирге, кесипкөйлүктүн ордуна такталбаган маалымат таратып жаткан блогерлердин үстөмдүгү күчөп, журналистиканын коомдогу ролу артка сүрүлүүдө.