Самарканд облусунун Тайлак районунда үч окуучу кыз кош бойлуу болуп калган. Бул тууралуу аталган облустун саламаттык сактоо башкармалыгынын кызматкери билдирди.

Атын атагысы келбеген кызматкердин айтымында, буга байланыштуу учурда Тайлак районунда 7-8-9-класстарда окуган кыздар жапырт түрдө УЗИге жөнөтүлүүдө.

Бул маалыматты кош бойлуу кыздар аныкталган мектептин мугалими да тастыктады.

– Бул окуя боюнча мектепте жыйналыш өттү. Окуучулардын арасында боюнда болуп калгандар бар экен, бирок алардын так саны белгисиз. Азыр ал кыздардын бирин күйөөгө беришүүдө. Башкаларын билбейм, – деди ал.

Буга чейин Өзбекстан Сенатынын төрайымы Танзила Нарбаева 2019-жылдын алгачкы алты айында эле жашы жете элек 46 кыздын боюнда болуп калганын, бул мурдагы жылдын ушул мезгилине салыштырмалуу 32 учурга көп экенин айткан.