Эрнис Кыязовду каралап, аны Искендер Матраимов менен телефондон сүйлөшүптүр деп жатышат. Биринчиден Искендер Матраимов менен телефондон сүйлөшүү качантан бери кылмыш болуп калган?- деген пикирин тележурналист Шайырбек Абдрахман билдирди.

Экинчиден эфирге чакырып жатканда бардык эле кишилер менен журналист ушундай эле сүйлөшөт. Интервью бере турган, эфирге чыга турган адам ушинтип сурап жана ким менен эфирге чыгаарын тактайт!
Үчүнчүдөн ал аудио жазууну угуп көрдүм. Эрнис ал жерде көрсөтүү эки тараптуу болот, келе бериңиз, бардык тараптардан чакырып жатабыз деп жатат. Бул аудиону чыгарып алып, бир кылмыштын бетин ачкансып айгай салгандар силердин жолуңар болсун!
Силер ушинтип каралаган жагынан, кишиге жалаа жапкан, гейттерди уюштуруп, каршылаш тарабыңарга шылуундарды шыкап, керек болсо жалаа менен адамды камап салуудан да кайра тартпаган жайыңар бар экенин элдин баары билип бүткөн!, - деп толуктаган Шайырбек мырза.

Эске сала кетсек, буга чейин жергиликтүү ММКлардын бири “Раим миллион мамлекеттик 5-каналдын директору менен кошуп журналисттерин да сатып алганы ачыкка чыгып жатабы? Буга төмөндөгү Искендер Матраимов менен Эрнис Кыязовдун аудио сүйлөшүүсү кашкайган далил эмей эмне? Ушул убакка чейин 5-канал Матраимовдордун былыктарын ашкерелеген теле берүүлөрдү жасап келген. Ал берүүлөрдү бул каналдын журналисти Элнура Алканова алып барчу. Керек болсо дал ушул Алканова президент Жээнбековго Раим Матраимовдун коррупциялык схемасы боюнча суроо берип, президент текшертүүгө убада берген. "Куураган куу кекиртек, кыйла жерди секиртет" демекчи, Матраимовдор Кыязовду баш, Алканованы төш кылып сатып алганбы?”, деп жазып чыккан эле.

Булак: NazarNews.kg