2024-жылдын бюджетин жана бир нече мыйзамдарды кабыл алгандан кийин түрк парламенти кышкы эс алууга чыкты. Мажлистин Башкы ассамблеясында Швециянын НАТОго кайрылуусу боюнча добуш берүү 16-январдан кийин өткөрүлүшү мүмкүн. Бул тууралуу “Haber Global” телеканалы билдирди.

26-декабрда Түркия парламентинин Эл аралык иштер комиссиясы Швецияны альянска кабыл алуу боюнча ратификациялык протоколду жактырды. Эми ал боюнча добуш берүү жалпы парламентте өтүшү керек. Аны бекитүү үчүн депутаттардын жөнөкөй көпчүлүк добушу жетиштүү.

“Бийликтеги Адилеттик жана Өнүгүү партиясы 600 орундуу парламентте көпчүлүккө ээ экенин эске алсак, швециялык талапкерди бекитүү маселеси президент Режеп Тайип Эрдогандын акыркы чечимине көз каранды”, - дешет серепчилер.

Түрк парламентинин тиешелүү комиссиясынын жетекчиси Фуат Октай, Башкы ассамблеянын Швециянын НАТОго мүчөлүк арызы боюнча тез добуш берүүнү күтпөшү керектигин эскертти.

Эрдоган Швециянын арызынын жактырылышынын АКШ Конгрессинин Анкарага F-16 согуштук учактарын сатуу чечимине байланыштуу болорун айтты.

Түрк лидери өткөн аптада телефон аркылуу сүйлөшүүсүндө АКШнын президенти Джо Байденди F-16 сатууга позитивдүү деп ишендирүүгө аракет кылган. Түркия бир нече жыл мурун АКШдан 40 F-16 Block 70 согуштук учагын жана 80 Block 70 жаңыртуу комплекттерин сураган. АКШнын мамлекеттик катчысы Энтони Блинкен Конгресстин кээ бир мүчөлөрү мындай камсыздоо Анкара үчүн Швецияны НАТОго кабыл алуу үчүн зарыл кадамдардын бири деп эсептей турганын айтты. Ноябрдын башында Түркиянын АКШдан F-16 согуштук учактарын сатып алуусу боюнча техникалык деңгээлдеги сүйлөшүүлөр аяктап, Анкара бул маселени оң жагына чечүүгө үмүттөнөрү кабарланган.

Швециянын биримдикке кирүү протоколдорун Венгрия менен Түркия гана ратификациялай элек. Королдуктун НАТОго кайрылуусун жактыруу үчүн Түркия өлкө бийлигинен жаңыланган антитеррордук мыйзамды ишке ашырууну, атап айтканда, Анкара тарабынан террордук уюм деп жарыяланган Күрдистан жумушчу партиясы менен күрөшүүнү талап кылууда.

Булак: NazarNews.kg