Кечээ, 8-февралда Кыргыз Республикасынын Курулуш, архитектура жана турак жай-коммуналдык чарба министри Нурдан Орунтаев Чүй облусунун Ысык-Ата районунда, Кочкорбаев айыл аймагында курулуп жаткан автоклавдык газобетон блокторун чыгаруучу заводдун курулушу менен таанышты. Бул тууралуу Курулуш министрлигинен билдиришти. 

Иш сапардын алкагында министр курулуш иштеринин жүрүшүн, өндүрүштүк корпустардын даярдык деңгээлин жана орнотулуп жаткан технологиялык жабдууларды көрүп чыгып, долбоордун өз убагында жана сапаттуу ишке ашырылышы үчүн министрлик тарабынан бардык зарыл колдоолор көрсөтүлөрүн белгиледи.

Аталган завод ОсОО “ХУА РУЙ” компаниясы тарабынан инвестициялык келишимдин алкагында курулуп, долбоордун жалпы баасы 10 млн АКШ долларын түзөт. Завод 2026-жылдын апрель айында пайдаланууга берилери пландалууда.

Ишкана заманбап кытай технологиялары менен жабдылып, күнүнө 500дөн 1500 куб метрге чейин, жылына 200 миң куб метрге чейин автоклавдык газобетон блокторун чыгарууга жөндөмдүү болот. Бул ички рынокту сапаттуу жана жеткиликтүү курулуш материалдары менен камсыздоого, ошондой эле импортко болгон көз карандылыкты азайтууга шарт түзөт.

Долбоордун ишке ашырылышы региондо жаңы жумуш орундарын түзүп, курулуш тармагынын туруктуу өнүгүшүнө өбөлгө болот. Заводдун ишке кириши турак жай жана инфраструктуралык объекттердин курулуш темпин жогорулатууга мүмкүндүк берет.

Учурда негизги өндүрүш корпустары курулуп бүтүп, жабдууларды монтаждоо иштери жүргүзүлүүдө. Кийинки этапта пуско-наладка иштери жүргүзүлүп, адистер окутулуп, заводду пайдаланууга берүү каралууда.