Украинанын аскерлери Донецкиге сокку урууда тыюу салынган "Лепесток" минасын колдонушкан. Бул тууралуу РИА Новости ДЭРдин аймактык коргоо штабына таянып кабарлады.

Буга чейин Көзөмөл жана координация борборунун ДЭРдеги өкүлчүлүгү бейшембиге караган түнү Украина аскерлери Донецкини үч ирет аткылагандыгын маалымдаган.

"Украинанын куралдуу күчтөрү Донецкинин Киев жана Куйбышев райондорун аткылашкан. Шаар тургундары жашаган жерлерге "Лепесток" миналарынын бир нечеси ыргытылган", — деген штаб.

Белгилүү болгондой, "Лепесток" минасы тыюу салынган курал-жаракка кирет.

Эске салсак, Орусия Украинага каршы согушту 24-февралда баштаган. Путин анын максаты "сегиз жылдан бери Киев режиминин басмырлоосуна, геноцидине кабылып келгендерди коргоо" жана бул үчүн "Украинаны демилитаризация жана денацификация" жасап жана Донбасстагы "жай жашоочулардын канына забын болгондорду" аскер сотуна берип, жоопкерчиликке тартуу пландалып жатат, деп айткан.

Орусия - анын куралдуу күчтөрү аскерий соккуларды Украинанын аскердик инфраструктурасы менен күч түзүмдөрүнө уруп жаткандыгын, жай жарандарга багытталбагандыгын билдирет. Орусиянын колдоосу менен ДЭР жана ЛЭР топтору да өз аракеттерин улантууда. Путин - Украинаны оккупациялоо туурасында кеп жок экенин айтат.

Ошондон кийин АКШ жана НАТО өлкөлөрү Орусияга карата буга чейин болуп көрбөгөндөй катаал санкциялык чектөөлөрдү киргизген. Москва Батыштын мындай аракетин "экономикалык согуш" деп атоодо.

Үч айдан ашкан согушта эки тараптан тең аскерлер жана жайкын тургундардан миңдеген курмандыктар катталды. 

Булак: NazarNews.kg