Маалыматка ылайык, Чүй облусунун Токмок шаарындагы Гагарин көчөсүндө жайгашкан көп кабаттуу үйлөрдүн биринен 71 жаштагы эркек кишинин жансыз денеси табылды. Бул тууралуу жергиликтүү маалымат булактары жазып чыкты.

«Бул окуяга бир жума болуп калды. Көп кабаттуу үйлөрдүн бириндеги бир батирдин эшиги бир-эки күн ачылбай, эч ким кирип-чыкпай калган. Анын ичинде карыган жалгыз бой киши жашай турганын билгендер тынчсызданып, куткаруучуларды чакырышкан. Алар ичинен бекитилип калган эшикти ачып киришсе 1949-жылы төрөлгөн К.В.А.нын жансыз денеси жатыптыр. Андан кийин милиция кызматкерлери келип, сөөктү алып кетишкен», - деп билдиришти алар.

Ошондой эле шаар тургундары Биринчи май көчөсүндөгү көп кабаттуу үйлөрдүн бириндеги батирдин ичинен дагы аял кишинин жансыз денеси табылганын кошумчалашты.

«Ушундай эле окуя. Куткаруучулар эшикти ачып, аял кишинин жансыз денесин табышты. Чылым чегип жатып уктап калган экен. Ошондо тамекинин чогу диванга түшүп, түтүнгө ууланып калыптыр», - деп билдиришти алар.

Чүй ОИИББдин басма сөз кызматынын маалыматына караганда, 2020-жылдын 15-январында Токмок шаардык ички иштер бөлүмүнө аталган шаардын райондорунун бириндеги батирден жансыз адамдын денеси табылганы кабарланган. Окуя болгон жерге ыкчам тергөө тобу барып, табылган жансыз дененин өздүгүн аныктаганда ал 70 жаштагы К.В. болуп чыккан. Денеге кароо жүргүзгөндө жараат жок экендигин аныкталган.

Аталган факт Кылмыштардын жана жоруктардын бирдиктүү реестрине катталган.

Ал эми жансыз денеси табылган аял киши тууралуу маалымат катталган эмес.

Булак: NazarNews.kg