Жалал-Абад облусунун Токтогул районунда 1-класстын окуучусу катуу сабалып, ооруканага түштү. Бул тууралуу жабыркаган баланын атасы жергиликтүү басылмаларга билдирди.

Маалыматка караганда, Токтогул районуна караштуу Торкен айылындагы Ашыралиев атындагы мектепте 1-класста окуган окуучуну 8-класстын окуучусу каттуу сабап салган. Сабалган бала денесинен, башынан жаракат алып, Бишкектеги ооруканалардын биринде дарыланууда. 

Окуя ушул жылдын 15-ноябрында катталган. 1-класстын окуучусу мектептен чыгып келе жатканда, 8-класстын окуучусу кармап алып, андан акча талап кылган. Бала акча жок экенин айткандан кийин, өспүрүм бала анын чөнтөктөрүн оодарып акча таап алган. «Эмнеге калп айтасың?» деп окуучуну катуу ур токмокко алып, андан соң бул тууралуу эч кимге айтпоосун талап кылган.  Сабаган баланын үстүнөн жабыркаган баланын ата-энеси арыз жазып, баланы  соттук-медициналык экспертизадан өткөрүшкөн. Азыркы учурда экспертизанын жыйынтыгы чыга элек.

Булак: NazarNews.kg