Түштүк Кореянын премьер-министри Ли Нак Ён Кыргызстанга расмий сапар менен 17-июлда келди.

Кыргызстан санариптештирүүдө Түштүк Кореядан тажрыйба алат. Бул тууралуу Мухаммедкалый Абылгазиев Бишкекте өтүп жаткан «Кыргызстан - Түштүк Корея» бизнес-форумунда билдирди. Анын айтымында, Түштүк Корея Кыргызстан үчүн ар тараптуу өнүгүүнүн үлгүсү.

- Кыргыз-корей соода-экономикалык карым-катнашын жакшыртууга бизде бардык мүмкүнчүлүктөр бар. Азыркы учурда Кыргызстанда корей капиталы менен кызматташкан миңге жакын ишкана бар. Анын ичинен 352си биргелешкен ишкана болуп эсептелет. Булар саламаттык сактоо, билим берүү, социалдык тейлөө, айыл чарба, кен казынасын пайдалануу, курулуш тармагындагы ишканалар. Арасында дүң жана чекене соода жаатындагы компаниялар басымдуулук кылат, - деди кыргыз өкмөт башчысы.

«Кыргызстан - Түштүк Корея» бизнес-форумуна Түштүк Кореянын премьер-министри Ли Нак Ён жана премьер-министр Мухаммедкалый Абылгазиев катышып жатат. Эки күндүк иш-чарада тараптар соода, айыл чарба, саламаттык сактоо, тоо-кен тармагы, туризм, энергетика, транспорт, текстил өнөр жайы, маалыматтык технологиялар чөйрөсүндө кызматташууну талкуулашат.

17-июлда кыргызстандык жана кореялык ишкерлердин ортосунда эки келишимге кол коюлду, анын бири электробула өнүмүн чыгаруу боюнча, экинчиси - түштүк кореялыктар Кыргызстанда медицинанын жетишкендиктерин пайдалануу менен заманбап курорт курууну көздөп жатышат.

Ли Нак Ёнду президент Сооронбай Жээнбеков кабыл алары жана расмий сапардын жыйынтыгы боюнча бир катар эки тараптуу документтерге кол коюлушу күтүлүүдө.

Булак: NazarNews.kg