Баку Sputnik Азербайжан редакциясына жана журналисттердин ишине эч качан доомат койгон эмес. Бул тууралуу Россия ТИМинин расмий өкүлү Мария Захарова Sputnik радиосунун эфиринде билдирди. 

Анын айтымында, Бакунун ушу тапта Sputnik Азербайджан агенттигине карата көрүп жаткан чаралары башка максатты көздөйт.

"Азербайжан тарап редакциянын ишине эч качан доомат койгон эмес. Азыркы кадамдар башка ниетте жасалып жатат. Бул тууралуу өлкөнүн элчисине да айтылды", — деди Захарова.

Ал Россия менен Азербайжан үчүн достук мамиле өтө маанилүү экенин, алаканы бузууга кызыкдар тараптар жакшылап ойлонушу керектигин белгиледи.

"Мындан пайда көрүүнү каалагандар бар. Алар абайлашы керек. Эки эл үчүн достук мамиленин мааниси абдан чоң, демек, ортого от салгысы келгендер алды-артын карашы зарыл", — деген Захарова.

Эскерте кетсек, Азербайжан бийлиги 30-июнь күнү "Россия сегодня" медиатобуна кирген Sputnik Азербайджан агенттигинин жетекчиси Игорь Картавых менен шеф-редактору Евгений Белоусов башында турган жети кызматкерди кармаган.

"Россия сегодня" медиатобу мындай аракеттерди негизсиз деп атап, коюлган айыптар ойдон чыгарылганын белгилеген. Редакциянын иши токтоп, кармалгандар менен байланышуу мүмкүн болбой жатат. Медиатоптун маалымат кызматы Картавыхтын саламаттыгы тынчсыздандырып жатканын, ага инсулин сыяктуу дары-дармек зарыл экенин кабарлады.

"Россия сегодня" Азербайжандын укук коргоо органдарынан мыйзамды сактоону жана милдетин аткарып жаткан адамдарды тезинен бошотууну талап кылды.

Медиатоптун башкы директору Дмитрий Киселев болуп жаткан окуялар адилетсиз экенин айтып, аларды Россия менен Азербайжандын мамилесин бузууну көздөгөн кадам катары баалаган.