Жалал-Абад: Вице-мэрге айланган окуучулар

Журналист: NAZARNEWS

22.11.2019, 20:48

19979

саясат

Жалал-Абад шаарындагы №1 мектеп-гимназиясынын башталгыч классынын 10 окуучусун шаар вице-мэри Руслан Алтымышев кабыл алды.

Вице-мэр окуучуларга өзүнүн аткарган жумушун түшүндүрүп, калаада жүрүп жаткан иштер менен тааныштырды. Андан соң балдарга ордун бошотуп берип, ар бир окуучунун оюн укту. Окуучулар белгилүү бир убакытка Алтымышевдин ордунда вице-мэр болуп, өздөрү туш болуп келген көйгөйлөрдү айтышты.

Балдар жаңы мектептер салынып, жолдордо жөө жүргүнчүлөр өтүүчү сызыктардын көп болушун каалашат. Ошондой эле бардык жарандарды тазалыкка чакырган ойлорун ортого салышты.

Жолугушуунун алкагында вице-мэр окуучуларды талыкпай билим алууга үндөп, балдарды ата-энесин, мугалимдерин тыңдоого чакырды.

Андан соң жолугушуу жогорку класстын окуучулары менен улантылды. Жогорку класстын окуучуларын шаардын биринчи вице-мэри Майрамбек Адылбеков да кабыл алды. Анда мектептердеги билим берүүнүн сапатын дагы да жогорулатуу боюнча окуучулардын сунуш-пикирлери айтылды.

Белгилей кетсек, бул иш-чара ЮНИСЕФтин демилгеси менен “Бүткүл дүйнөлүк балдар күнүнө” карата уюштурулду.

Булак: NazarNews.kg