Кыргызстандын Борбордук шайлоо комиссиясынын (БШК) мүчөсү Атыр Абдрахматова шайлоонун жыйынтыгы кандай учурда жокко чыгарылары тууралуу маалымат берди. Ал 5-октябрда «Азаттыктын» түз эфирдеги «Эксперттер талдайт» телеберүүсүнө катышкан учурда мыйзам боюнча шайлоо жыйынтыгы арыздардагы маалыматтар аныкталса жокко чыгарыларын түшүндүрдү.

Анын айтымында, арыздардагы маалыматтар аныкталса шайлоо жыйынтыгы жокко чыгарылышы мүмкүн.

«Мыйзам боюнча шайлоо өткөндөн кийин үч күндүк мөөнөттө добушканалардагы мыйзам бузуу фактылары боюнча арыздар аймактык жана Борбордук шайлоо комиссияларына тапшырылышы керек. Эң биринчи кезекте аны аймактык шайлоо комиссиялары карап, эгерде чындап эле мыйзам бузуу болду деп аныкталып, табылса, ошол тилкедеги добуш берүүнүн жыйынтыгын жокко чыгарууга укук бар. Андан сырткары БШК шайлоонун жалпы жыйынтыгын чыгарып жатканда ошол шайлоо тилкелериндеги добуш берген адамдардын жалпы санынын үчтөн бир бөлүгүнүн добуштарын жокко чыгарган болсок, анда шайлоо жыйынтыгы жокко чыгарылат».

Булак: "Азаттык"