Бишкекте административдик-аймактык реформанын алкагында көчөлөрдүн кайталанган аталыштарын жоюу жана бир багытта жайгашкан көчөлөрдүн аталыштарын бирдейлештирүү иштери жүргүзүлүүдө.

Бишкек шаардык кеңеши 2026-жылдын 31-майында №89 токтом кабыл алып, ага ылайык бир катар көчөлөр жана проспектилер төмөнкүдөй аталыштарга бириктирилди:

1. Михаил Фрунзе көчөсү (Новопавловка), Дэн Сяопин, Чүй жана Шабдан Баатыр проспектилери — Чүй проспектиси;
2. 7-Апрель жана Курманжан Датка көчөлөрү — Курманжан Датка көчөсү;
3. Жайыл Баатыр көчөсү, Абсамат Масалиев жана Аалы Токомбаев проспектилери, Кайыков көчөсү — Аалы Токомбаев проспектиси;
4. Анварбек Чортеков жана Кривоносов көчөлөрү — Абсамат Масалиев көчөсү;
5. Лев Толстой, Путепроводная жана Сары-Өзөн көчөлөрү — Шабдан Баатыр көчөсү;
6. Чыңгыз Айтматов проспектиси жана Манас көчөсү — Чыңгыз Айтматов проспектиси;
7. Жаш Гвардия бульвары жана Махатма Ганди көчөсү — Иманалы Айдарбеков көчөсү;
8. Селекционная жана Муромская көчөлөрү — Махатма Ганди көчөсү;
9. Юлиус Фучик көчөсү жана Васильевский тракты — Манас көчөсү;
10. Жибек Жолу жана Жеңиш проспектилери — Жибек Жолу проспектиси;
11. Максим Горький жана Анкара көчөлөрү — Анкара көчөсү;
12. Чалагыз Иманкулов жана Карыбек Тыналиев көчөлөрү — Карыбек Тыналиев көчөсү;
13. Байтик Баатыр, Жусуп Абдрахманов, Абдынасыр Элебесов жана Борбордук көчөлөрү — Жусуп Абдрахманов көчөсү;
14. Береговая, Окраинная, Көк-Сай, К. Курманалиев жана Набережная көчөлөрү — Дэн Сяопин көчөсү;
15. Исхак Раззаков көчөсү (Новопавловка) жана Асипа Темирова көчөсү — Анварбек Чортеков көчөсү;
16. Виноградная көчөсү — Лев Толстой көчөсү;
17. Николай Гоголь көчөсү (Новопавловка) — Чалагыз Иманкулов көчөсү;
18. Ленская жана Юбилейная көчөлөрү — Жайыл Баатыр көчөсү.

Учурда Кыргыз Республикасынын Министрлер Кабинетине караштуу Жер ресурстары, кадастр, геодезия жана картография боюнча мамлекеттик агенттиктин Бишкек шаардык филиалы жаңы аталыштарга ылайык даректик номерлерди өзгөртүү иштерин аяктап жатат.

Бул этап бүткөндөн кийин Бишкек мэриясы көчөлөргө жаңы аталыштар жазылган аншлагдарды орнотуп, коммуналдык кызматтардын жана коомдук транспорттун маалыматтарын жаңылайт.

Мындан тышкары, жаңы даректер мамлекеттик маалыматтык системалар жана маалымат базалары менен интеграцияланат. Даректик маалыматтар «2ГИС» жана «Яндекс Карты» картографиялык сервистерине да жаңыртуу үчүн берилет.

Ошондой эле өзгөртүлгөн көчөлөрдүн жашоочуларына жаңы даректер тууралуу маалымат берүү боюнча тиешелүү техникалык жана уюштуруучулук иштер жүргүзүлөт.