Стамбулда Айэркен Саймаити атып өлтүрүлгөндүгүн баары эле билди. Ал бир убакта Сузак районунан мыйзамсыз паспорт алгандыгын калың эл укту. Аны өлтүргөндөр кармалгандыгын көбү өз көзү менен көрдү. Өлтүрүлгөн жаран Кыргызстандын Стамбул шаарындагы Башкы консулу Эркин Сопоковдун унаасы менен Стамбул аралап жүргөндүгүн тыңдады. Сопоков иштен четтетилгенин жазбаган басылма калбады.

Эми бул иште дагы эмне шумдук коомчулукка чыгып кетет деп баары күтүп жатат. Дагы көп нерсе буюрса эми чыгат, дагы көп нерселер мүмкүн болушунча жашырылат эмеспи.

Фейсбуктагы Беспредел КG тайпасында кызыктуу маалымат чыкты. Көрсө, азыркы кыргыз саясатынын “серый кардиналдарынын” бири, Жогорку Кеңештин депутаты Төрөбай Зулпукаровдун консультанты болуп, дал ошол мурунку башкы консул Эркин Сопоковдун уулу эмгектенет экен. Сопоков тигил жакта Интерполдо издөөдө жүргөн адамга унаасын берсе, уулу Зулпукаровдо консультант болсо кандай болуп калат? 

Ошентип эле илим-билимге карабай, тааныш-туунуш аркылуу бири-бириңерди жумушка орноштуруп отура берсеңер ашмалтайыңар мындан дагы катуу чыгат го жакында... 

Төмөндө Беспредел КG тайпасындагы маалыматты өзгөртүүсүз сунуштайбыз.

Саймаити-Сопоков-Зулпукаров

Стамбулдагы экс-консул бийлик алмашып, Атамбаевдин кадрлары бүт тазаланганына карабастан кызматта турган. Сопоков Эркин Мамасалиевичтин крышасы ким? Баарыбызга белгилүү, серый кардинал, азыркынын Икрамы Төрөбай Зулпукаров. Сопоковдун уулу Мамасалиев Азамат Эркинович Төрөбай Зулпукаровдун консультанты болуп иштейт. Сопоков, Саймаити аркылуу кимдер көмүскө иштерди бүтүрүп, кимдер гана бизнес кылган?

Булак: NazarNews.kg