Президенттин иш башкармалыгына караштуу «Кыргыз жээги» мамлекеттик ишканасы жоюлат. Тиешелүү №373 токтомго Министрлер кабинетинин төрагасы Адылбек Касымалиев 2025-жылдын 27-июнунда кол койгон.

Документке ылайык, Президенттин иш башкармалыгына жоюу комиссиясын түзүү жана жоюу процедурасынан келип чыккан бардык зарыл чараларды көрүү тапшырылды.

Токтомдун аткарылышын көзөмөлдөө Президенттин администрациясынын президенттин жана Министрлер кабинетинин чечимдеринин аткарылышын контролдоо башкармалыгына жүктөлдү.

Токтом расмий жарыяланган күндөн тартып 7 күндөн кийин күчүнө кирет.

«Кыргыз жээги» мамлекеттик ишканасы Ысык-Көл районунун Бостери айылында, Ысык-Көлдүн түндүк жээгинде жайгашкан ден соолукту чыңдоочу комплекс. Юстиция министрлигинин маалыматы боюнча, компаниянын жетекчиси Абдуллаев Өскөнбек Оморбекович.

Ишкана 1975-жылы негизделген.

Буга чейин «Кыргыз жээги» ведомстволук эс алуу жана саламаттыкты сактоо структурасынын курамына кирген, анын ичинде мамлекеттик органдардын кызматкерлери үчүн санаторий жана эс алуу базасы катары пайдаланылган.

2023-жылы ишкананын мүлкү Президенттин иш башкармалыгынын оперативдүү башкаруусуна өткөрүлгөн. Комплекске түрдүү категориядагы мейманкана корпустары, жыйын-залдар, көрктөндүрүлгөн пляж, медициналык жана санаторийдик-курорттук багыттагы объекттер кирет.

2025-жылдын май айында ишкана реорганизациялоого жана менчиктештирүүгө тийиш болгон объекттердин тизмесине кирген. Министрлер кабинетинин чечимине ылайык, мүлктүк комплекс мамлекеттик менчикти башкаруу программасын ишке ашыруунун алкагында «Кыргызалтын» ААКтын уставдык капиталына өткөрүлүшү керек.

2025-жылдын 27-июнунда Министрлер кабинети «Кыргыз жээги» мамлекеттик ишканасын жоюу жөнүндө токтом кабыл алды.