Орусия Сириядагы операциялар маалында авиациянын коопсуздугун камсыздоо боюнча АКШ менен түзүлгөн келишимди убактылуу токтотууну чечти. Орусиянын Тышкы иштер министрлигинен билдиришкендей, бул Идлиб провинциясындагы химиялык чабуулдан кийин АКШнын Сирия авиабазасына сокку уруусуна жооп болду.

Мекеме соккулар алдын ала даярдалганын жана АКШ Идлибдеги окуяларды «күчүн көрсөтүү үчүн шылтоо катары» пайдаланганын билдирди. Москва абалды талкуулоо үчүн БУУнун Коопсуздук Кеңешинин шашылыш жыйынын өткөрүүгө чакырды.

Буга чейин Кремль АКШнын Сирияга ракеталык сокку уруусу көз карандысыз өлкөгө каршы агрессия болуп эсептелерин жана дүйнө коомчулугунун назарын Ирактагы жай тургундар арасындагы көптөгөн курмандыктардан башка жакка буруу аракети экенин билдирген.

7-апрелде АКШ президенти Дональд Трамптын буйругу менен Американын аскердик кемелери Сириянын өкмөттүк аскерлеринин Шейрат аскер-аба базасын аткылаган. Соккулар Сирия авиациясынын жай тургундарга каршы химиялык курал колдонуусуна жооп болгону кабарланган. Чабуулдун жыйынтыгында ондогон жай тургун набыт болгон.

Булак: "centralasian.org"