Өзбекстанда президенттик шайлоого мөөнөтүнөн мурда добуш берүү 14-20-октябрда өтөт, деп билдирет өзбек БШКсынын басма сөз кызматы.

Шайлоо күнү жашаган жеринде боло албаган шайлоочу мөөнөтүнөн мурда добуш берүүгө укуктуу.

Мөөнөтүнөн мурда добуш берүү үчүн шайлоочу себебин көрсөтүп, арыз менен тиешелүү шайлоо түйүнүнө кайрылат. Толтурулган шайлоо бюллетени тийиштүү участкалык шайлоо комиссиясынын сейфинде чапталган конвертте сакталууга тийиш.

Өзбекстанда президенттик шайлоо үстүбүздөгү жылдын 24-октябрында өтөт. Шайлоого өлкөнүн беш партиясынан беш талапкер катышат: Өзбекстан элдик демократиялык партиясы Борбордук кеңештин төрагасынын орун басары Максуда Ворисованы, «Милли Тикланиш» ДП — Алишер Кадыровду, Өзбекстандын Экологиялык партиясы — партиянын борбордук кеңешинин аткаруу комитетинин төрагасы Нарзулло Обломуродовду, «Адолат» партиясы Бахром Абдухалимовду, Өзбекстандын Либерал-демократиялык партиясы азыркы президент Шавкат Мирзиёевди көрсөткөн.

Булак: NazarNews.kg