Арзыбек Бурканов бир дагы кадрды мага алып келген жок. Мен кандай буйрук берсем ошону гана аткарып жүрдү. Бул тууралуу президент Садыр Жапаров КТРКга берген маегинде билдирди.

Журналист мамлекет башчыга коомчулукта Арзыбек Бурканов кадрдык саясатка түздөн-түз кийлигишип, көп маселени чечип койгон киши катары сыпатталып жатканын айтып, мунун канчалык чындыгы бар экенин сурады.

«Бул ушакчылардын эле сөзү. Арзыбек Бурканов бир дагы кадрды мага алып келген жок. Мен кандай буйрук берсем ошону гана аткарып жүрдү. Мен мурункулардай болуп бир адамдын жетегинде кетип калбайм. Мен муну акыркы жолу бардыгына айтып коёюн. Иш жүзүндө дагы көрсөтөм. Эгер бирөө кадр жибере турган болсо, анын артын текшериш үчүн УКМКга же ИИМге жөнөтөм. Ал жактан деле кээ бирөөлөр таза деп келет. Бирок кызматка койсоң эле тааныштары, кошуна-колоңдору мындай иштери бар деп бир нерсеси чыгып калып жатпайбы», — деди Жапаров.

Мамлекет башчы жаш кадрлар боюнча дагы пикирин билдирген.

«Жаш кадрларды өстүрүп чыгуу үчүн 5-10 жыл убакыт керек экен. Ага чейин колубузда бар кадрларды, алардын тажрыйбасын колдонушубуз керек. Эртең кайсы бир тармакка жаш кадрды коюп, ишти тартып кетишин мен күтсөм болот. Бирок мамлекет, эл күтпөйт экен да. Эл 1-2 жылдан кийин эле кана жыйынтык деп сурайт. А мен жаш кадрларды коюп койдум эле, алар ишти жылдыра албай жатат деп айта албайм. Ошон үчүн эски кадрларды, мейли булганган болсо дагы алып келип, бул жерге сени коёюн, бирок көнгөн адатыңа кирип кетсең кесилесиң деп жатабыз», — деди президент.

Ал ошондой эле кайсы аткаминер эмне менен шугулданып жатканы ага бир саатта эле жетип калаарын, Кыргызстанда бир нерсени жашыруу мүмкүн эместигин кошумчалады.

Булак: NazarNews.kg