Россиянын Эмгек сиңирген артисти Вячеслав Гришечкин 61 жашында каза болду. Бул тууралуу  актёр иштеген Түштүк-батыштагы Москва театрынан билдиришкенин орус басылмалары жазып чыгышты.

Гришечкин 15-сентябрда каза болгонун “Комсомольская правда” жазды. Басылманын маалыматына караганда, Гришечкин бир жума мурун жүрөгү ооруп, ооруканага түшкөн.

Гришечкин Түштүк-Батыш театрында 1977-жылы негизделгенден бери кызмат кылып келет. Актёр ошондой эле РАМТда иштеп, Волжский атындагы драма театрын жетектеп, 2017-жылдан бери Россиянын Ички иштер министрлигинин Москва университетинин алдындагы театралдык студияны жетектеп келген.

Вячеслав Гришечкин 160тан ашык тасмада роль жараткан. Анын эң белгилүү ролдорунун бири - "Солдаты" сериалындагы полковник Александр Старокон. Ал ошондой эле "Счастливы вместе", "Каменская" жана "Бригада" сериалдарында роль жараткан.

1994-жылы Вячеслав Гришечкинге "Россиянын эмгек сиңирген артисти" наамы ыйгарылган, ал эми 2013-жылы II даражадагы "Мекенге кызматы үчүн" ордени менен сыйланган.

Булак: NazarNews.kg