Сот дагы жылдырылды... Бул шылтоо эмей эмине?

Журналист: NAZARNEWS

19.07.2019, 2:54

19470

саясат

Мына чыгат, ана чыгат деген Текебаевдин соту кайра 21-августка жылдырылды. Көрсө сотторго кылмыш ишиндеги эпизоддорду окуп чыкканга убакыт аздык кылып жатыптыр. Бул шылтоо эмей эмине?

Же чын эле ар бир деталына чейин окуп чыгууну соттор каалап жатабы? Жок эй. Алар бул иштин ийне-жибине чейин билишет. Жаттап чыкпаса да Маевскийдин кылган жоруктарынан кабары бар.

Айтор, дагы бир айдан ашык убакытка Өмүкенин пикирлештери чыдабаска илаажысы жок. Сот айттыбы, демек кыңк этүүгө айла табылбайт. Болгону Асия Сасыкбаеванын “аргументтери” кандай деңгээлге жетери табышмак бойдон турат. Ансыз деле бул фракция парламентте оппозиция катары саналат. Ал эми турмушта “Ата Мекен” партиясы чындап ошондой ыкмага өтөбү кеп ошондо. Учурдагы бийликтин деле колкосуна сөөк болуп тыгылган Өмүрбек Текебаевдин соту дагы канча мезгилге созуларын көзү ачыктар деле айталбайт шекилди.

Ким билет, балким “өтө таанымал” көзү ачык Света Тойгонбаевага жолдугун калың кылып лидердин жердеши Сайдылла Нышанов барса “саясий жыт” башкача нукта ачылып кетээр. Кур аякка бата жүрбөсүн андан көрө билеби десең сараң неме, - дейт "Ачык сөз" гезити.

Булак: NazarNews.kg