Түркия жана Пакистан Сауд Арабиясынын коопсуздугун чыңдоо максатында өлкөгө макулдашылган аскер күчтөрүн жана аскердик мүмкүнчүлүктөрүн жөнөтүүгө даяр экенин билдирди.

Бул тууралуу Түркия, Сауд Арабиясы жана Пакистандын Тышкы иштер министрликтери «Мекке коргонуу альянсынын» Стратегиялык саясий жана коргонуу комитетинин кезексиз жыйынынын жыйынтыгында биргелешкен билдирүү жарыялашты.

Жыйын 5-октябрда Сауд Арабиясынын борбору Эр-Рияд шаарында өтүп, анда өлкөнүн коопсуздугуна байланышкан абал жана учурдагы коркунучтар талкууланган.

Тараптар үч өлкөнүн ар биринин коопсуздугу жалпы жамааттык коопсуздуктун ажырагыс бөлүгү экенин белгилешти. Ошондой эле Сауд Арабиясына макулдашылган аскер күчтөрүн жана мүмкүнчүлүктөрдү оперативдүү түрдө жайгаштыруу боюнча чараларды көрүү чечими кабыл алынган.

Биргелешкен билдирүүдө Мекке жана Медина шаарларына сокку урууга жасалган аракеттер, ошондой эле Сауд Арабиясынын шаарларына, жарандык жана экономикалык объектилерине жасалып жаткан чабуулдар кескин айыпталды.

Түркия менен Пакистан Сауд Арабиясынын Куралдуу күчтөрүнүн өлкөнүн коопсуздугун жана аймактык бүтүндүгүн коргоодо көрсөткөн даярдыгын жана кесипкөйлүгүн жогору баалашты.

Мындан тышкары, комитет Пакистандын отставкадагы генерал-полковниги Науман Махмудду үч жылдык мөөнөткө «Мекке коргонуу альянсынын» башкы катчысы кылып дайындоо чечимин кабыл алды.

Тараптар бул кадам альянстын өнүгүшүнө жана жамааттык коргонуу жаатындагы максаттарына жетишүүгө өбөлгө болоруна ишеним билдиришти.