Маданият, маалымат жана туризм министрлиги Мамлекеттик циркти жетектегиси келген талапкерлердин программалары менен таанышууда. Министр Азамат Жаманкуловдун айтканы боюнча, азыр төрт кишинин талапкерлиги каралып жатат.

- Азыр талапкерлердин программаларын, концепцияларын карап жатабыз. Бир кишиге токтолуп, чечим чыга элек. 2-3 күндүн ичинде жетекчини коюп калышыбыз керек, - деди ал.

Эки айга жакын убактан бери жетекчи дайындалбай жатканына нааразы болгон Мамлекеттик цирктин кызматкерлери бүгүн, 21-январда Жогорку Кеңештин алдына митингге чыгарын “Азаттыкка” билдиришкен. Алар жетекчини дайындоо жең ичинен чечилип, бул тармакта мурда-кийин иштебеген адамды алып келүү аракети болуп жатканын айтып жатышат. 

Эскерте кетсек, цирктин кызматкерлери циркти "министрге тапшырдык" деп жумуштан баш тартып жатышат. Цирктин кызматкерлери митингге чыгышаарын билдиришти.

Булак: NazarNews.kg