Чүй ОИИББи менен Аламүдүн РИИБинин кызматкерлери таксисттин өмүрүнө кол салган эки адамды колго түшүрүштү. Бул тууралуу Чүй ОИИББинин басма сөз кызматы кабарлады.

Маалыматка караганда, ушул жылдын 28-октябрда Бишкектин четиндеги “Калыс-Ордо” конушунда 27 жаштагы таксистке кол салышкан. Эки адам таксиге отуруп, шаар сыртындагы айылдардын бирине жеткирип коюшун суранышкан. “Калыс-Ордого” жеткенде жүргүнчүлөр таксистке кол салышкан. Таксистти бычак менен коркутуп, 7 миң сомун, уюлдук телефонун алышкан да, анын колу-бутун, көзүн, оозун скотч менен таңып, камыштардын арасына таштап салышкан.

Бул факт Аламүдүн РИИБи тарабынан Кылмыштардын жана жосундардын бирдиктүү реестрине каракчылык беренеси менен катталган.

Ыкчам иш-аракеттердин натыйжасында, көп өтпөй таксистти карактаганга шектелип эки жаран кармалган. Алар: мурда соттолгон 1997-жылы туулган М.Т. аттуу Нарын облусунун тургуну жана 1998-жылы туулган С.Н. аттуу Жалал-Абад облусунун тургуну. Кылмышка шектелип кармалгандар СИЗОго киргизилген. Учурда тергөө иштери жүрүп жатат.

Булак: NazarNews.kg