Үйлөрүнөн  ажырап калуу коркунучунда турган  Ак-Жар конушунун тургундары жолду бууп, нааразычылыктарын билдиришүүдө. Бул тууралуу Ак-Жар конушунун тургундары NazarNews маалымат агенттигине кабарлашты.  

Маалыматка караганда, жогорку электр зымын Калыс Ордого Ак-Жар аркылуу алып өтүү пландалган. Бирок Ак-Жар конушунун тургундары буга каршы бүгүн, 8-декабрда митингге чыгышты.  Бул маселени тактоо иретинде конуштун айыл өкмөтүнө байланышканыбызда, төмөндөгүдөй жооп берди:

"Нааразы болуп элдин митингге чыгып жаткандыгынын себеби, шаардык таштанды төгүүчү жайга таштандыларды кайра иштетүүчү завод курулганы жатат.  Таштанды төгүүчү жай  Калыс-Ордо конушунда жайгашкандыгына байланыштуу, Дордой базарында жайгашкан “Электросила”  компаниясынын чоң көмөк чордонунан  кубаттуулугу жогору электр зымы Ак-Жар конушу аркылуу алып өтүлүшү керек. План боюнча  ток  Ак-Жар конушунун  борбордук көчөсү  аркылуу  26-көчөгө чейин,  андан соң  26-көчөдөн күн батышты көздөй Калыс-Ордого жеткирилиши күтүлүүдө. Аталган кубаттуулугу күчтүү зымдарды алып өткөндөн кийин, ал жер кызыл зонага айланып, үйлөр 80 метр алыстыкта  жайгашышы кажет. Буга байланыштуу Ак-Жар конушунан кеминде  500 түтүн үй  сүрүлүшү мүмкүн. Ал эми  жергиликтүү конуштун тургундары буга нааразы” ,– деп билдирди айыл өкмөттөн. 

Эске салсак,  Аламүдүн районунун карамагына кирген  Ак-Жар конушу 2005- жылы  мурунку президент Аскар Акаев кеткенден кийин басып алуу жолу менен түптөлгөн конуш. Аталган конуштун жалпы аянты 128 гектар болсо, узундугу 3 чакырымды түзүп, 42 көчөдөн турат. 
Учурда бул конушта 2 миңден ашык түтүндө 15 миңдей тургун жашайт. 2011-жылы   Алмазбек Атамбаевдин буйругу менен  87 миллон сомго свет менен суу киргизилген. Учурда 2 коомдук транспорт каттайт. Ак-Жар конушу жарым жартылай мыйзамдаштырылган айыл болуп эсептелет.

Булак: NazarNews.kg