Европадагы энергетикалык кризис барган сайын күчөй берет. Бул тууралуу Орусиянын Коопсуздук кеңешинин төрага орун басары Дмитрий Медведев өзүнүн Telegram-каналында билдирди.

Анын айтымында, оппоненттер Орусиянын отун-энергетикалык комплексин аксатып, өлкөнүн Арктикадагы позициясын алсыратуу үчүн бардык аракетин көрөт.

"Анткен менен батыш мамлекеттеринин орусиялык энергетика ресурсунан баш тартуу ниети миллиондогон европалыктын жашоосуна терс таасирин тийгизип жатат. Бүгүнкү күндө алар энергетикалык каатчылыкка тушугууда, кризистин масштабы барган сайын кеңейе берет. Мындай кырдаалдан антиорусиялык агрессиянын башында турган АКШ өзү да жабыркады", — деди Медведев.

Эске салсак, Орусия Украинага каршы согушту 24-февралда баштаган. Путин анын максаты "сегиз жылдан бери Киев режиминин басмырлоосуна, геноцидине кабылып келгендерди коргоо" жана бул үчүн "Украинаны демилитаризация жана денацификация" жасап жана Донбасстагы "жай жашоочулардын канына забын болгондорду" аскер сотуна берип, жоопкерчиликке тартуу пландалып жатат, деп айткан.

Орусия - анын куралдуу күчтөрү аскерий соккуларды Украинанын аскердик инфраструктурасы менен күч түзүмдөрүнө уруп жаткандыгын, жай жарандарга багытталбагандыгын билдирет. Орусиянын колдоосу менен ДЭР жана ЛЭР топтору да өз аракеттерин улантууда. Путин - Украинаны оккупациялоо туурасында кеп жок экенин айтат.

Ошондон кийин АКШ жана НАТО өлкөлөрү Орусияга карата буга чейин болуп көрбөгөндөй катаал санкциялык чектөөлөрдү киргизген. Москва Батыштын мындай аракетин "экономикалык согуш" деп атоодо.

Үч айдан ашкан согушта эки тараптан тең аскерлер жана жайкын тургундардан миңдеген курмандыктар катталды. 

Булак: NazarNews.kg