Кыргызстанда кытай жаранынан туулган жээндердин саны 25 миңге жетиптир. Статистика боюнча алардын дээрлик жалпысы мыйзамдуу никеден туулган эмес. Убактылуу жашап, бала төрөтүп, кийин кайра өз мекенине кайтып кеткен кытайлар дагы бар. Ал эми биздин арабызда кыргызча сүйлөгөн, бирок кытай канынан жаралган муун пайда болуп жатат. Бул коркунучтуубу? Кытайлар менен турмуш кургандар албетте жыргап кеткендер эмес. Ошол себептүү эки никеге турууну мыйзамдаштыруу керек деген оюмдун себептеринин бири ушул. -деген пикирин журналист Назира Бегим билдирди.

Аталган журналист буга чейин "Фейсбуктагы" өзүнүн баракчасына эки аял алууну мыйзамдаштыруу керек деп жазган посту талкууга түштү. "ЭКИ АЯЛ Азыр коомчулукта эки аял алуу тууралуу сөз дайым талкууга алынат. Бул, убагында, жоокерчилик заманда адаттагыдай эле көрүнүш, салт катары кабылданып келген.

Совет учурунда бул салт токтогон. Азыр, диний көз карашты тутунган, ислам баалуулугун карманган кыздар эки аял алуу маселесин туура эле кабыл алат. Алар, шарият мыйзамын сыйлашат. Дагы бир топ , эки аял алуу жөнүндө сөз болгондо сынга алып, өтө туура эмес дешет. Бирок, муну эки жактуу кароо зарыл. Эки аял тең макулдугу менен үй бүлөө курган маалда, бирөөсү мыйзамдуу аял катары каттала албайт. Мамлекет буга жол бербейт.

Бирок, демократиялуу мамлекет болгонубуз менен адам укуктарын ушул жерден чектеп коюп жатабыз. Мисалы, биринчи аял макулдугун берсе, баары ынтымактуу бир көз карашты карманса эки аялга тең мыйзамдуу никеге туруу мүмкүнчүлүгү берилиш керек. Ушундай мыйзам долбоору кайра каралышы шарт. Азыр, жумушка жарамдуу кыргыз улутундагы калк мигрант болуп сыртка кетип жатат. Акыркы убактагы далилдерди карагыла, өзбек жана дунган улуту бат өсүп жатат. Ошондуктан титулдук улуттун кызыкчылыгы үчүн эки никеге мыйзамдуу туруу жолун караштыруу керек. Мен кызмын, бирок улуттук деңгээлде жеке аялдык кызыкчылыкты экинчи орунга калтырыш керек",- деп жазган ал.

Булак: NazarNews.kg