Президент мыйзам алкагында жүргүзүлгөн журналисттик ишмердүүлүк басым-кысымга себеп болбошу керектигин белгилеген.

Президент Садыр Жапаров иликтөөчү журналист Болот Темировдун кармалышы боюнча үн катты. Өлкө башчы билдирүүсүн Facebook баракчасына чыгарган.

Жапаровдун айтымында, мыйзам алкагында жүргүзүлгөн кандай гана кесиптик ишмердүүлүк болбосун, анын ичинде журналисттик ишмердүүлүк дагы басым-кысымдын тигил же бул түрүнө себеп болбошу керек. Ар бир иш бардык жагдайларды эске алуу менен калыс иликтениши зарыл.

"Болот Темиров жана башкалардын баңгизат менен кармалгандыгына байланыштуу иштердин адилет тергелишине толук көз салып турам. Ошол эле убакта журналисттерден дагы жалпы элдин алдында бирөөнү жөнү жок каралап, айып койгондон алыс болсоңуздар деп суранып кетет элем. Бир нерсе айтардан мурда чын-аныгын тактап алып, жоопкерчиликти сезип, анан чыгарып туруңуздар", — деп жазган мамлекет башчы.

Президент УКМК башчысы Камчыбек Ташиевдин маалымат жыйынын видеосун чыгарып, өзүнө карата каралоонун жалган экенин ийне-жибине чейин түшүндүрүп бергенин билдирди.

"Азыр мамлекеттик ар бир ишкана мурдагыдай жашыруун иштебейт. Баары ачык. "Керек болсо бир нече оппозициялык журналисттен турган комиссия түзүп, текшерип келгиле, биз шарт түзүп берели" деп эң туура айткан. Текшергенге толук мүмкүнчүлүгүңөр бар. Бизде баары ачык. Мындан ары журналистсиңби, чиновниксиңби же жөнөкөй жарансыңбы — баарыбызга мыйзам бирдей иштейт", — деген Жапаров.

Кечээ, 22-январда, Бишкекте иликтөөчү журналист Болот Темировду милиция кызматкерлери кеңсесине келип кармаган. Бишкек ШИИБ ага карата Кылмыш-жаза кодексинин 283 ("Башкага берүү максатын көздөбөстөн баңгизат каражаттарын мыйзамсыз даярдоо") жана 287-беренелерине ("Баңгизат каражаттарын жана психотроптук заттарды колдонууга жакын") ылайык кылмыш иши козголгонун билдирди. Бүгүн анын баш коргоо чарасы каралып, ал эч жакка кетпөө тууралуу тил каттын негизинде бошотулду.

Болот Темиров коомчулукка иликтөөчү журналист катары таанымал. Ал жакында эле Temirov LIVE YouTube каналы аркылуу "Эки күндө 37 миллион сомду тапса болот? Садыр Жапаров жана Ташиевдин схемасы" деген темада иликтөө жарыялаган. УКМК төрагасы бүгүн Камчыбек Ташиев маалымат жыйынын өткөрүп, Темировдун сайтындагы иликтөөлөрдө жазылгандардын баары калп экенин айткан.

Булак: NazarNews.kg