Тажикстанда Турсунзада шаардык ички иштер башкармалыгынын кылмыш иликтөө бөлүмүнүн тергөөчүсү Эраж Наимов кармалды. Ал жалган жалаа менен киши өлтүрүүгө айыпталган жергиликтүү жашоочуга кыйноо көрсөтүүгө шектелүүдө.

Мурда ушул эле иш боюнча Эраж Наимовун мурдагы эки кесиптеши да камалган. Соттолуучулардын туугандары алардын кыйноо колдонгонун четке кагышууда, адвокаттары болсо ЖМКларга интервью берише элек.

Сот жараяны былтыркы жылдын жай мезгилинен бери Тажикстан Жогорку сотунун имаратында өтүүдө.

2017-жылы ноябрда Турсунзаде шаарында ижарага алып жашап жүргөн батиринен официант Дмитрий Каримовдун сөөгү табылган. Бул факт боюнча алгач Хасан Ёдгоров аттуу жергиликтүү тургун кармалган. Кийинчерээк официантты Леонид Мальченков аттуу адам өлтүргөнү аныкталып, 2018-жылы ал 21 жылга соттолгон.

Буга чейин Хасан Ёдгоров “Азаттыктын” тажик кызматына маек куруп, кыйноого алынганын, буга байланыштуу күнөөнү мойнуна алууга аргасыз болгонун билдирген. “Мени төрт жолу электр тогу менен кыйнашкан. Чыдабай, өзүмө каршы документке кол коюп берүүгө аргасыз болгом”, – деген ал.

Хасан Ёдгоров 2018-жылы августта бошонуп чыккан. Мыйзам боюнча ал компенсация талап кылууга милдеттүү.